TITULUS III DE EXEQUIIS ECCLESIASTICIS (Cann. 1176 – 1185)

Can. 1176 - § 1.  Christifideles defuncti exequiis ecclesiasticis ad normam iuris donandi 

sunt.  

§ 2.  Exequiae ecclesiasticae, quibus Ecclesia defunctis spiritualem opem impetrat eorumque 

corpora honorat ac simul vivis spei solacium affert, celebrandae sunt ad normam legum 

liturgicarum.  

§ 3.  Enixe commendat Ecclesia, ut pia consuetudo defunctorum corpora sepeliendi 

servetur; non tamen prohibet cremationem, nisi ob rationes christianae doctrinae contrarias 

electa fuerit.