TITULUS II DE VARIIS TRIBUNALIUM GRADIBUS ET SPECIEBUS (Cann. 1417 – 1445)

Can. 1417 - § 1.  Ob primatum Romani Pontificis integrum est cuilibet fideli causam suam 

sive contentiosam sive poenalem, in quovis iudicii gradu et in quovis litis statu, 

cognoscendam ad Sanctam Sedem deferre vel apud eandem introducere.  

§ 2.  Provocatio tamen ad Sedem Apostolicam interposita non suspendit, praeter casum 

appellationis, exercitium iurisdictionis in iudice qui causam iam cognoscere coepit; quique 

idcirco poterit iudicium prosequi usque ad definitivam sententiam, nisi Sedes Apostolica 

iudici significaverit se causam advocasse.

Can. 1418 - Quodlibet tribunal ius habet in auxilium vocandi aliud tribunal ad causam 

instruendam vel ad actus intimandos.