Caput XXXIV Si omnes debeant aequaliter necessaria accipere

^[1] Sicut scriptum est: Dividebatur singulis prout cuique opus erat. ^[2] Ubi non dicimus ut personarum – quod absit – acceptio sit, sed infirmitatum consideratio; ^[3] ubi qui minus indiget agat Deo gratias et non contristetur, ^[4] qui vero plus indiget humilietur pro infirmitate, non extollatur pro misericordia; ^[5] et ita omnia membra erunt in pace.

^[6] Ante omnia, ne murmurationis malum pro qualicumque causa in aliquo qualicumque verbo vel significatione appareat; ^[7] quod si deprehensus fuerit, districtiori disciplinae subdatur.