In omni opere suo dedit confessionem Sancto et Excelso in
verbo gloriae Eccli. 47
Verba haec dicuntur de David ad litteram, et satis
convenienter assumuntur ad ostendum causam huius operis: in quibus ostenditur
quadruplex causa huius, scilicet materia, modus seu forma, finis, et agens.
Materia est universalis: quia cum singuli libri canonicae
Scripturae speciales materias habeant, hic liber generalem habet totius
Theologiae.
Et hoc est quod
dicit Dion. 3, libro Caelest. Hierar. Divinarum odarum (idest Psalmorum)
sacram scripturam intendere est sacras et divinas operationes universas
decantare
Unde signatur
materia in hoc quod dicit, in omni opere, quia de omni opere Dei
tractat.
Est autem
quadruplex opus Dei; scilicet creationis, Gen. I, cap. Requievit Deus die
septima ab omni opere etc.; gubernationis, Ioan. 5. Pater meus usque
modo operatur etc.; reparationis, Ioan. 4. Meus cibus est ut faciam
voluntatem eius qui misit me, ut perficiam opus eius; glorificationis,
Eccli. 42, Gloria Domini plenum est opus eius.
Et de his omnibus
complete in hac doctrina tractatur
Primo de opere
creationis Psalm. 8, Videbo caelos tuos opera digitorum tuorum.
Secundo gubernationis, quia omnes historiae veteris
testamenti tanguntur in hoc libro: Psalm. 77, Aperiam in parabolis os meum
etc.
Tertio, reparationis, quantum ad caput, scilicet Christum,
et quantum ad omnes effectus gratiae, Psal. 3. Ego dormivi, et somnum etc.
Omnia enim quae
ad fidem incarnationis pertinent, sic dilucide traduntur in hoc opere, ut fere
videatur Envangelium, et non Prophetia.
Quarto est opus
glorificationis: Psalm. 149. Exultabunt sancti in gloria eius etc.
Et haec erit
ratio quare magis frequentatur Psalterium in Ecclesia, quia continet totam
Scripturam.
Vel, secundum
Glossam, ad dandam nobis spem divinae misericordiae: quia cum peccasset David,
tamen per poenitentiam est reparatus.
Materia ergo
universalis est, quia omne opus.
Et quia hoc ad
Christum spectat, Coloss. 1, In ipso complacuis omnem plenitudinem
divinitatis inhabitare; ideo materia huius libri est Christus, et membra
eius.
Modus seu forma in Sacra Scriptura multiplex invenitur.
Narrativus, Eccli. 22. Nonne Deus fecit sanctos suos
enarrare omnia mirabilia sua?. Et
hoc in historialibus libris invenitur.
Admonitorius, et
exhortatorius, et praeceptivus, ad Titum 2. Haec loquere, et exhortare, et
argue cum omni imperio: secun. Tim. 2. Haec commone, testificans coram
Deo etc.
Hic modus
invenitur in Lege, Prophetis, et Libris Salomonis.
Disputativus; et
hoc in Iob, et in Apostolo: Iob 13. Disputare cum Deo cupio
Deprecativus, vel laudativus; et hoc invenitur in isto
libro; quia quicquid in aliis libris praedictis modis dicitur, hic ponitur per
modum laudis, et orationis: infra (Psalm. 9) Confitebor tibi, Domine, etc. narrabo etc.
Et ideo dicit, Dedit confessionem, quia per modum
confitendi loquitur.
Et hinc sumitur
ratio tituli qui est, Incipit liber hymnorum, seu soliloquiorum Propheta
David de Christo.
Hymnus est laus
Dei cum cantico; canticum autem exultatio mentis de aeternis habita, prorumpens
in vocem.
Docet ergo
laudare Deum cum exultatione.
Soliloquium est
collocutio hominis cum Deo singulariter, vel secum tantum, quia hoc convenit
laudanti, et oranti.
Huius Scripturae
finis est oratio, quae est elevatio mentis in Deum. Damasc. lib. 3, Oratio
est ascensus intellectus in Deum. Psalm. 140. Elevatio manuum mearum,
sacrificium vespertinum.
Sed quatuor modis anima elevatur in Deum:
scilicet ad admirandum celsitudinem potestatis ipsius. Esa.
40. Levate in excelsum oculos vestros, et videte quis creavit haec.
Psalm. 103. Quam mirabilia sunt opera tua, Domine! Et haec est elevatio fidei.
Secundo elevatur
mens ad tendendum in excellentiam aeternae beatitudinis, Iob. 11. Levare
poteris faciem tuam absque macula; eris stabilis, et non timebis: miseria
quoque oblivisceris; et quasi fulgur meridianus consurget tibi. Et haec est
elevatio spei.
Tertio elevatur mens ad inhaerendum divinae bonitati et
sanctitati. Esa. 51. Elevare, consurge, Hierosalem etc. Et haec est elevatio charitatis.
Quarto elevatur mens ad imitandum divinam iustitiam in
opere. Tren. 3 Levemur corda nostra cum manibus ad Deum in caelos. Et haec est elevatio iustitiae.
Et iste
quadruplex modus insinuatur cum dicit: Sancto, et Excelso: quia duo
ultimi modi elevationis pertinent ad hoc quod dicit, Excelso.
Et quod hic sit
finis scriptuae huius, habetur in Psalmis. Primo de Excelso Psalm. 112. A
solis ortu... etc. et post, Excelsus super omnes etc.
Secundo de Sancto
Psalm. 95. Confiteantur nomini tuo magno, quoniam terribile, et sanctum est.
Ideo Greg. I.
Hom. dicit super Ezech. quod vox psalmodiae si cum intentione cordis agitur,
omnipotenti Deo per eam ad cor iter paratur, ut intenta anima aut prophetia
mysteria, aut gratiam compunctionis infundat.
Finis ergo est,
ut anima coniungatur Deo, sicut Sancto, et Excelso.
Auctor autem
huius operis significatur ibi in verbis gloriae
Notandum autem,
quod aliud est in Sacra Scriptura, et aliud in aliis scientiis.
Nam aliae
scientiae sunt per rationem humanam editae, haec autem Scriptura per instinctum
inspirationis divinae, 2. Pet. 1. Non enim voluntate humana allata est
Prophetia, sed Spiritu Sancto inspirati locuti sunt etc.
Et ideo
lingua hominis se habet in Scriptura Sacra, sicut lingua pueri dicentis verba
quae alius ministrat.
Psalm. 44. Lingua mea calamus etc. 2. Reg. 23. Spiritus Domini locutus est per me, et
sermo eius per linguam meam.
Et ideo dicit: in verbo Domini, vel gloria: quae per
revelationem dicuntur. Unde 3. Regum 20. Percute me in sermone Domini,
idest in revelatione divina
Et potest dici haec Scriptura verbum gloriae quatuor modis:
quia quadrupliciter se habet ad gloriam; scilicet quantum ad
causam a qua fluit, quia a verbo glorioso Dei haec doctrina emanavit. 2. Pet. 1. Voce delapsa huiuscemodi a
magnifica gloria: Hic est filius meus dilectus etc.
Quantum ad continentiam, quia in illo libro gloria Dei
continetur quam annuntiat Psalm. 96, Annuntiate inter gentes gloriam eius.
Quantum ad modum emanationis. Gloria enim idem est quod claritas. Et revelatio
huius Prophetiae gloriosa fuit, quia aperta.
Triplex est enim
modus Prophetiae. Per sensibiles res: Dan. 5. Apparuerunt digiti, quasi
hominis scribentes ... Rex aspiciebat articulos manus scribentis.
Per similitudines
imaginarias, sicut patet de somnio Pharaonis, et interpretatione facta per
Ioseph Gen. 41. Isaiah 6. Vidi Dominum sedentem super solium excelsum, et
elevatum, etc.
Per ipsius
veritatis manifestationem; et talis modus Prophetiae convenit Danieli, qui
solius Spiritus Santi instinctu, sine omni exteriori adminiculo, suam edidit
Prophetiam.
Alii namque
Prophetae, sicut dicit Augu.
per quasdam rerum imagines atque verborum tegumenta, scilicet per somnia, et
visiones facta, et dicta prophetaverunt; sed iste unde doctus fuit de veritate?
Unde 2. Reg. 23.
cum diceret David: Spiritus Domini locutus est etc. statim addit: sicut
lux aurorae oriente sole mane absque nubibus rutilat.
Sol est Spiritus
Sanctus illuminans corda prophetarum, qui quandoque sub nubibus apparet,
quandoque per duos modos praedictos Prophetis illucet, quandoque sine nubibus,
sicut hic.
Et ad hoc adduci
potest quod dicitur 2. Regum 6. Quam gloriosus fuit hodie Rex Israel,
discooperiens se ante ancillas servorum suorum, et nudatus est.
Et quia per eam
nos invitat ad gloriam, Psalm. 149. Gloria haec est omnibus sanctis eius,
bene praemittitur, Quam gloriosus etc..
Patet ergo materia huius operis, quia de omni opere Domini.
Modus, quia
deprecativus, et laudativus. Finis, quia ut elevati coniungamur Excelso et
Sancto. Auctor, quia ipse Spiritus Sanctus hoc revelans.
Sed antequam ad
litteram veniamus, circa hunc librum tria in generali consideranda sunt. Primo
de translatione huius operis. Secundo de modo exponendi. Tertio de eius distinctione.
Translationes
sunt tres. Una a principio Ecclesiae tempore Apostolorum; et haec vitiata erat
tempore Hieronymi propter scriptores. Unde ad preces Damasi Papae Hieronymus
Psalterium correxit, et hoc legitur in Italia.
Sed quia haec
translatio discordabat Graeco, transtulit rursus Hieronymus ad preces Paulae de
Graeco in Latinum; et hoc Damasius Papa fecit cantari in Francia, et concordat
de verbo ad verbum cum Graeco.
Post quidam
Sophronius aliquando disputans cum Iudaeis, cum dicerent Iudaei aliqua non sic
se habere, sicut ex secunda translatione Psalterii introducerat, dictus
Sophronius rogavit Hieronymum, ut Psalterium de Hebraeo in Latinum transferret.
Cuius petitioni annuit Hieronymus, quae trnaslatio concordat omnino cum
Hebraeo; sed non cantatur in aliqua Ecclesia, habetur tamen a multis.
Circa modum exponendi sciendum est, quod tam in Psalterio
quam in aliis Prophetiis exponendis evitare debemus unum errorem damnatum in
quinta Synodo.
Theodorus enim Mopsuestenus dixit, quod in Sacra Scriptura,
et prophetiis nihil expresse dicitur de Christo, sed de quidbusdam aliis rebus;
sed adaptaverunt Christo: sicut illud Psalm 21. Diviserunt sibi vestimenta mea etc. non de Christo, sed ad litteram dicitur
de David.
Hic autem modus
damnatus est in illo Concilio, et qui afferit sic exponendas Scripturas,
haereticus est.
Beatus ergo
Hieronymus super Ezech. tradidit nobis unam regulam, quam servabimus in
Psalmis; scilicet quod sic sunt exponendae de rebus gestis, ut figurantibus
aliquid de Christo, vel Ecclesia. Ut enim dicitur I. Cor. 10. Omnia
in figura contingebant illis.
Prophetiae autem aliquando dicuntur de rebus quae tunc
temporis erant, sed non principaliter dicuntur de eis, sed inquantum figura
sunt futurorum; et ideo Spiritus Sanctus ordinavit quod quando talia dicuntur,
inferantur quaedam quae excedunt conditionem illius rei gestae, ut animus
elevetur ad figuratum.
Sicut in Daniele multa dicuntur de Antiocha in figura
Antichristo; unde ibi quaedam leguntur quae non sunt in eo completa,
implebuntur autem in Antichristo; sicut etiam aliqua de Regno David et
Salomonis leguntur quae non erant implenda in talium hominum Regno, sed impleta
fuere in Regno Christi, in cuius figura dicta sunt, sicut Psalm. vi. Deus iudicium etc., qui est secundum titulum de Regno
David et Salomonis; et aliquid ponit in eo quod excedit facultatem ipsius,
scilicet: Orietur in diebus eius iustitia, et abundantia pacis, donec
auferatur luna: et iterum: Dominabitur a mari usque ad mare, et a
flumine usque ad terminos etc.
Exponitur ergo psalmus iste de Regno Salomonis, inquantum
est figura Regni Christi in quo omnia complebuntur ibi dicta.
Distinctio
autem prima est quod sunt centum quinquaginta Psalmi; et competit mysterio,
quia componitur numerus iste ex 70 et 80. Per 7 a quo denominatur 70,
significatur decursus huius temporis, quod peragitur septem diebus; per 8 vero,
a quo denominatur 80, status futurae vitae.
Octava enim
secundum Glossam est resurgentium; et significat quod in hoc libro tractantur
ea quae pertinent ad decursum praesentis vitae, et gloriam futurae.
Item per
septem significatur vetus testamentum. Patres namque veteris testamenti septenario serviebant: observabant enim
septimum diem, septimam septimanam, septimum mensem, et septimum annum septimae
decadis, qui dicitur Iubileus.
Per octo vero
significatur novum testamentum: celebramus enim diem octavum, scilicet diem
Dominicum propter solemnitatem dominicae resurrectionis; et in hoc libro
continentur mysteria veteris et novi testamenti.
Secunda
distinctio est secundum quosdam qui dicebant, quod Psalterium dividitur in
quinque libros per quinque Psalmorum distinctiones, quae fiunt per Fiat,
fiat, vel Amen, amen. Et in hoc notatur finis libri cuiuslibet
secundum eos; et hoc est primo in Psalmo 40 Beatus qui intelligit.
Item in 71,
Deus iudicium tuum. Item in 88. Misericordias Domini. Item in
106. scilicet in secundo Confitemini; et sunt quinque libri. Sed haec
distinctio non est apud Hebraeos, sed pro uno libro habetur: Act. 1. Sicut
scriptum est in libro Psalmorum: Fiat commoratio etc.
Quod autem
dicit, Fiat, fiat, vel Amen, amen, non refertur ad finem libri,
quia in aliis libris multoties hoc ponitur, nec est finis libri.
Tertio
distinctio est, quia Psalmi distinguuntur in tres quinquagenas: et haec
distinctio comprehendit triplicem statum populi fidelis: scilicet statum
poenitentiae; et ad hunc ordinatur prima quinquagena, quae finitur in Miserere
mei Deus, qui est Psalmus poenitentiae. Secunda iustitiae; et haec
consistit in iudicio, et finitur in Psalmo 100, Misericordiam, et iudicium.
Tertia laudem gloriae concludit
aeternae, et ideo finitur, Omnis spiritus laudet Dominum.
Sed circa ordinem
psalmorum sciendum est, quod psalmi quidam tangunt historias, sed non sunt
ordinati secundum ordinem historiae. Nam Diligam te Domine, pertinet ad historiam Saulis; sed Domine,
quid multiplicati sunt, ad historiam pertinet Absalonis, et haec est
posterior: unde aliquid aliud significant praeter historiam tantum.
Prima ergo
quinquagena pertinet ad statum poenitentiae, et ideo figuraliter tractatur in
ea de tribulationibus, et impugnationibus David, et liberatione eius. Et
ut divisio fiat secundum litteram, David in Regno suo existens contra duplicem
impugnationem, vel persecutionem orat. Primo contra eam quae fuit contra totum
populum Dei; et hoc in quinta decade Psalm. 41. Quemadmodum desiderat cervus ad fontem aquarum, ita desiderat
anima mea ad te, Deus.
Universaliter autem iustus in persona sua dupliciter
affligitur. Quandoque a temporaliter
persequentibus, quandoque ab aliquibus iniuste viventibus. 2. Pet. 2. Animam
iusti iniquis operibus cruciabant. Psalm. 118. Defectio renuit me etc.
Et ideo
primo ponit psalmos pertinentes as primam persecutionem David, secundum quod
significat aliquid contra Christum, et Ecclesiam. Secundo, ad secundam
tribulationem pertinentes, in quarta decade, Psalm. 31. Beati quorum remissa sunt iniquitates.
Item David in
Regno suo existens duplicem tribulationem passus est, quia a specialibus
personis, et a toto populo. Primo ergo ponuntur Psalmi contra primam. Secundo psalmi in quibus orat contra
secundam, et hoc in tertia decade (Ps. 21), scilicet Deus, Deus.
A specialibus
autem personis duabus persecutionem passus est, scilicet ab Absolone, et Saule.
Et per hoc significatur persecutio quam sancti patiuntur vel a domesticis vel
ab extraneis: sic Christus passus est a Iuda, et a Iudaeis. Primo ergo
ponuntur Psalmi contra primum; secundo contra secundum, et hoc in secunda
decade, Psal. 11. Salvum me fac, Domine, quoniam defecit sanctus, quoniam
diminuta sunt veritates a filiis hominum. Primo ergo agendum est de prima
decade, in qua praemittitur Psalmus iste, scilicet Beatus vir etc.
|