a. Iudica Domine nocentes me; expugna impugnantes me.
b. Apprehende arma et scutum; et exurge in adiutorium
mihi. Effunde frameam, et conclude adversus eos, qui persequuntur me: dic
animae meae, Salus tua ego sum.
c.
Confundantur et revereantur: et quaerentes animam meam. Avertantur retrorsum,
et confundantur: cogitantes mihi mala.
d. Fiant
tamquam pulvis ante faciem venti: et angelus Domini coarctans eos. Fiant viae
illorum tenebrae et lubricum: et angelus Domini persequens eos.
e. Quoniam gratis
absconderunt mihi interitum laquei sui: supervacue exprobraverunt animam meam.
f. Veniat illi
laqueus quem ignorat, et captio quam abscondit, apprehendat eum: et in laqueum
cadat in idipsum.
g. Anima autem mea exultabit in Domino: et delectabitur
super salutari suo. Omnia
ossa mea dicent, Domine quis similis tibi? Eripiens inopem de manu fortiorum
eius, egenum et pauperem a diripientibus eum.
h. Surgentes
testes iniqui, quae ignorabam interrogabant me. Retribuebant mihi mala pro
bonis, sterilitatem animae meae.
i. Ego autem cum mihi molesti essent, induebar cilicio.
Humiliabam in ieiunio animam meam: et oratio mea in sinu meo convertetur.
j. Quasi proximum, et quasi fratrem nostrum sic
complacebam: quasi lugens et contristatus, sic humiliabar.
k. Et adversum me laetati sunt, et convenerunt:
congregata sunt super me flagella, et ingoravi.
l. Dissipati
sunt, nec compuncti, tentaverunt me, subsannaverunt me subsannatione:
frenduerunt super me dentibus suis.
m. Domine quando respicies? restituere animam meam a
malignitate eorum, a leonibus unicam meam.
n. Confitebor tibi in ecclesia magna: in populo gravi
laudabo te. Non supergaudeant
mihi, qui adversantur mihi inique: qui oderunt me gratis, et annuunt oculis.
Quoniam mihi quidem pacifice loquebantur, et in iracundia terrae loquentes,
dolos cogitabant. Et dilataverunt super me os suum, dixerunt, Euge, euge,
viderunt oculi nostri.
o. Vidisti
Domine, ne sileas: Domine ne discedas a me.
p. Exurge et
intende iudicio meo, Deus meus, et Dominus meus in causam meam. Iudica me
secundum iustitiam tua Domine Deus meus: et non supergaudeant mihi. Non dicant
in cordibus suis, Euge, euge animae nostrae, neque dicant, Devorabimus eum.
q. Erubescant,
et revereantur simul, qui gratulantur malis meis. Induantur confusione, et
reverentia, qui maligna loquuntur super me.
r. Exultent et
laetentur, qui volunt iustitiam meam, et dicant semper, Magnificetur Dominus,
qui volunt pacem servi eius. Et lingue mea meditabitur iustitiam tuam; tota die
laudem tuam.
a. In Psalmis praecedentibus manifestata est
dignitas iustorum; hic autem imploratur auxilium contra persecutiones impiorum:
et circa hoc tria facit. Primo enim petit divinum auxilium contra
peccatores persequentes. Secundo confitetur sibi huiusmodi tribulationes dari
propter peccatum, ibi, Domine ne in furore. Tertio ostendit suam fiduciam quam habet in
Deo, ibi, Expectans expectavi.
Circa primum tria facit. Primo enim petit divinum auxilium
contra impiorum persectionem. Secundo describit eorum nequitiam, ibi, Dixit
iniustus. Tertio ostendit eorum prosperitatem esse contemnendam, ibi, Noli
aemulari.
Titulus communis
est, In finem Psalmus ipsi David. Mystice pertinet ad Christum verum
David: et secundum mysticam expositionem est secundus Psalmus eorum qui prolixe
loquuntur de passione Christi. Primu fuit, Deus Deus meus respice.
Hic ergo Psalmus sive legatur ex persona David, sive
Christi, vel cuiuscumque, duo facit. Primo enim petit impiorum repulsam.
Secundo assignat causam, ibi, Surgentes testes.
Circa primum tria facit. Primo enim petit adversariorum
condemnatione. Secundo proponit condemnationis interitum, scilicet eorum
culpam, ibi, Quoniam gratis. Tertio assignat fructus condemnationis
huius, ibi, Anima autem mea.
Circa primum duo facit. Primo enim proponit in generali suam
petitionem. Secundo explicat eam, ibi, Apprehende arma etc.
Circa primum duo petit in generali, scilicet condemnationem
eorum, et divinum auxilium, ibi, Expugna. Haec enim duo petit contra duo: nam contra
nocentes petit condemnationem, et contra impugnantes petit divinum auxilium.
Primo quis impugnat alium. Secundo praevalens ei nocumentum
infert. Est ergo hic ordo praeposterus. Quando enim aliquis impugnat alium, non
statim meretur condemnationem, sed concitatur impugnatus ad petendum auxilium;
quando vero nocet, tunc petit condemnationem.
Et ideo hic
distinguit utrumque, quia nocumentum prius est in intentione inferentis: et
ideo primo petit condemnationem nocentium. Dicit ergo O Domine iudica
nocentes me.
Est autem triplex
iudicum, scilicet condemnationis: Iac. 2. Iudicium sine
misericordia illi, qui non fecerit misericordiam. Item purgationis: Nehe. 4. Tempus est ut
incipiat iudicium a domo Domini. Item discretionis: Ps. 42. Iudica me
Deus, et discerne causam meam.
Hic autem agitur
de primo. Similis petitio
habetur Hier. 2. Tu autem Domine Sabaoth qui iudicas iuste, et probas renes
et corda, videam ultionem tuam ex eis.
Contra Matt.
5. Orate pro persequentibus, et calumniantibus vos.
Respondeo. Dicendum
quod in omnibus istis imprecationibus duplex est intellectus. Unus quod
dicantur per modum praenunciationis, ut cum dicit, Iudica; quasi dicat,
iudicabis.
Vel ut omnia intelligantur prolata non ex zelo vindictae propriae,
sed divinae iustitiae, cui se conformant iusti.
Secundo impugnatus desiderat ut adversario resistat; unde
ait, Expugna impugnantes me, fit, scilicet non praevaleant in me: Hier.
20. Dominus mecum est tamquam bellator fortis: Isa. 63. Ego qui loquor
iustitiam, et propugnator sum ad salvandum.
b. Consequenter cum dicit, Apprehende arma,
explicat petitionem suam. Duo enim petit, scilicet condemnationem nocentium, et
expugnationem impugnantium.
Et ideo in particulari ista duo explicat. Primo enim explicat
secundum. Secundo primum, ibi, Confundantur.
Circa primum quinque proponit, quae sunt necessaria in
defensore. Primum est quod se armet:
quod hoc tangit dicens, Apprehende arma, et scutum. Arma Dei sunt
electi eius: Rom. 6. Exhibete membra vestra arma iustitiae Deo. Unde
angeli dicuntur arma Dei, quibus utitur ad pugnandum contra malos: Sap. 5.
Pugnabit pro illo orbis terrarum contra insensatos.
Scutum Dei proprie est divina protectio, et voluntas sua qua
protegit: Ps. 5. Scuto bonae voluntatis tuae coronasti eos. Dicit ergo, Apprehende
arma et scutum, idest Mitte sanctos tuos, et tu etiam protege me, bona
voluntate tua.
Vel, Arma et scutum, sunt virtutes: Sap. 3. Induet
pro thorace iustitiam, sumet scutum inexpugnabile aequitatem.
Secundum est, quod procedat ad bellum; et ideo dicit, Exurge
in adiutorium mihi. Deus dicitur
dormire, quando homo est in tribulationibus, et non sentit auxilium divinum: Matt.
8. Motus magnus factus est in mari, ita ut navicula operiretur fluctibus, ubi
erant discipuli, ipse vero dormiebat, et concitaverunt eum dicentes: Domine
salva nos, perimus. Et surgens imperavit ventis, et mari, et facta est
tranquillitas magna; Ps. 41. Exurge quare obdormis Domine.
Tertium est
exemptio gladii; et ideo dicit, Effunde frameam, Hieronymus habet, Evagina
gladium. Framea idem est, quod gladius. Veruntamen, Effunde, hic
designat abundantiam divinae vindictae.
Glossa, Effunde
frameam, idest multiplica vindictam: Zac. 15. Framea suscitare super
pastorem meum, et super virum cohaerentem mihi. Framea potest
intelligi vel vindicta Dei, vel anima Christi, vel quilibet iustus, qui sunt
gladius Dei contra malos: 1 Cor. 2. Spiritualis autem diiudicat omnia.
Quartum est
percussio; et ideo dicit, Et conclude etc. Hieronymus habet, Et
praeoccupa ex adverso persequentes me; quasi dicat, Prius percutias, quam
sibi cavere possint. Et hoc etiam proprie dicitur concludi, quasi non potest
evadere: Iob 10. Cum sit nemo qui de manu tua possit eruere.
Vel concludi quis
dicitur, quando convincitur de falsitate: unde, Conclude, ait; quasi
dicat, convince eos ut errorem suum cognoscant.
Quintum est, ut
eripiatur ille qui protegitur: unde dicit, Dic animae mea, salus tua ego
sum; quasi dicat, Per effectum manifesta, ut per inspirationem cognoscam te
esse salutem animae meae: Ps. 84. Audiam quid loquatur in me Dominus Deus:
Isa. 43. Ego Dominus, et non est absque me salvator.
c. Consequenter cum dicit, Confundantur,
agit de condemnatione nocentium. Et primo petit eorum condemnationem. Secundo
adhibet similitudinem, ibi, Fiant tamquam pulvis etc.
Circa primum duo
petit in condemnationem contra duo, quae mali persequentes intendunt.
Principaliter enim intendunt eum totaliter destruere: Ps. 82. Non memoretur
nomen Israel ultra. Secundo intendunt, quod saltem inferant ei aliqua mala,
et de utroque petit eos condemnari. Secundum, ibi, Avertantur.
Circa primum duo facit. Primo enim ponit poenam quam
expetit. Secundo subdit eorum demeritum, ibi, Quaerentes animam meam.
Poenam petit
duplicem, scilicet confusionem, et timorem. Confusio autem consistit in hoc
quod non potest quis suum implere intentum. Secundum est, quod deficiens a
proposito, timet ne incidat, vel in similem poenam, vel in manus adversarii. Et
ideo dicit quantum ad primum, Confundantur; et quantum ad secundum, Revereantur,
idest timeant similem poenam.
Simile habetur Hier.
17. Confundantur qui me persequuntur, et non confundar ego etc. Hoc etiam
potest reduci ut intelligatur esse dictum pro confusione eorum, de bona scilicet
confusione, et de bono timore, ut salubriter confundantur ad poenitentiam.
Et
revereantur, idest
timeant poenas, etiam si meritum eorum contradicat, quia sunt quaerentes animam
meam.
De secundo dicit, Avertantur. Et circa hoc duo facit.
Primo enim petit ut impediantur a proposito. Secundo, quod confundantur
impediti, ibi, Et confundantur.
Dicit ergo, Avertantur retrorsum, non valentes
proficere in eo quod intendunt, sed, Deficiant, in posterius, et ex hoc
confundantur. Potest etiam ad bonum reduci, Avertantur retrorsum, ut me
sequantur: Mar. 8. Vade retro Satana.
Et
confundantur, de peccatis
suis: Rom. 6. Quem
fructum habuistis in illis, in quibus nunc erubescitis. Cogitantes mihi mala: Hier. 18. Tu scis
Domine omne consilium eorum adversum me in mortem.
d. Deinde cum dicit, Fiant, adhibet
similitudinem. Et primo quantum ad primum. Secundo quantum ad secundum, ibi, Fiant
viae illorum.
Dicit ergo, Fiant tamquam pulvis. Petit namque primo iudicium contra eos, qui
quaerebant eum totaliter destruere; et ideo similitudinem adhibet de re, quae
totaliter destruitur, scilicet de pulvere.
Dispositio enim
pulveris ex tribus contingit, ex pulveris scilicet dispositione; quia siccus
est pulvis, et in minima divisus: et ideo facile dispergibilis est.
Et ideo dicit, Fiant
tamquam pulvis, ut sicut pulvis comminutus est in multis propter defectum
humoris, ita sint et impii.
Alia ratio est
ventus commovens: unde ait, Ante faciem venti. Ventus quandoque
significat tribulationem: Io. 27. Tollet eum ventus urens etc. Quandoque
ipsam tentationem peccati: Is. 64. Iniquitates vestrae quasi ventus abstulerunt vos.
Tertio ex impulsu
alicuius impellentis ventum: unde ait, Et angelus Domini coarctans eos,
scilicet ad hoc ut totaliter dispergantur: nam sicut per auxilium angelorum
aliqua prosperantur virtute maiori, ita ex angelis bonis, vel malis contingit
quod tribulationes magis gravantur: nam Deus quandoque punit etiam per bonos
angelos peccatores: Is. 37. Egressus est angelus Domini, et percussit in
castris Assyriorum centum octogintaquinque millia etc.
Deinde cum dicit, Fiant viae illorum, ponitur
similitudo de secundo impedimento, idest de processu viae; et tria impedimenta
ponit in via.
Primum est
tenebrae: quia tunc de facili quis impingit. Fiant ergo viae illorum,
idest processus, Tenebrae.
Secundum est,
quod sit lubrica et disposita ad casum: Thren. 4. Lubricaverunt vestigia
vestra in itinere viarum nostrarum.
Et tertium est,
quod sit aliquis persequens et cogens, ut magis corruat. Et angelus Domini
etc. Prov. 17. Angelus crudelis contra eum mittetur. Dicit ergo, Fiant
viae illorum tenebrae, ignorantiae: Ps. 81. Nescierunt, neque
intellexerunt, in tenebris ambulant. Et lubricum, idest vitia carnalia in
quibus de facili cadunt.
Et angelus
Domini persequens eos.
Ipse daemon tentans ad peccandum, vel angelus bonus permittens cadere, ut
humiliati fortiores resurgant.
e. Supra Psalmista petiit, quod nocentes
iudicarentur, et expugnantes in expugnatione venirent; hic autem ostendit, quomodo
merito haec patiantur. Et primo ponit culpam. Secundo poenam, ibi, Veniat
illis.
Circa primum proponit primo malitiae interpretationem.
Secundo executionem, ibi, Supervaeue. In primo ponuntur tria, quae
aggravant culpam.
Primum est
iniquitas; et ideo dicit, Gratis. Secundum est fraus; et ideo dicit, Absconderunt.
Tertium est crudelitas; et ideo dicit, Interitum laquei sui.
Dicit ergo, Quoniam gratis. Si aliquis intentat malum
contra se nocentem, non videtur totaliter iniquum; sed quando contra eum qui in
nullo nocuit, hoc omnino est iniquum: et hoc est quod dicit, Gratias,
scilicet sine offensa quam fecerim: Io. 15. Odio habuerunt me gratis: Isa. 52. Assur absque
ulla causa calumniatus est eum.
Fraus vero
notatur, cum dicit, Absconderunt mihi, quia scilicet per fraudem
intentant mala mihi: Thren. 3. Ursus insidians factus est mihi, leo in
absconditis: Ps. 9. Insidiatur quasi leo in spelunca sua.
Crudelitatem
autem ostendit, quia parant insidias ad mortem: unde ait, Interitum laquei
sui, idest abscondunt laqueum ad mortem: Prov. 1. Veni nobiscum,
insidiemur sanguini, abscondamus tendiculas contra insontem, frustra
deglutiamus cum etc.
Secundo, cum
dicit, Supervacue exprobraverunt, ponitur executio, similiter sine
causa. Dicit autem Exprobraverunt, quia opprobria intulerunt. Est autem
opprobrium, quando quis imponit crimen alicui, quod est contra eius honorem.
Aliquando
imponitur crimen alicui, ut confundatur et abiiciatur. Aliqundo vero ut perdat
vitam, et hoc est contra animam eius; et ideo dicit, Animam meam; quasi
dicat, Propter hoc fecerunt, ut totaliter me vita privarent. Sic Iudaei
Christo imposuerunt crimina morte digna: Luc. 23. Commovit populum, docens
per universam Iudaeam: Ps. 68. Improperia exprobrantium tibi ceciderunt super
me.
Sed hoc, Supervacue, idest sine causa, sicut supra
dictum est, scilicet gratis: Io. 8. Quis ex vobis arguet me de peccato?Ergo,
Supervacue, imposuerunt ei peccatum.
Vel, Supervacue, idest frustra, quantum ad eorum
intentionem: quia intendebant fidem eius destruere: Io. 11. Quid facimus
quia hic homo multa signa facit? Si dimittimus etc.
Tamen hoc
consilium fuit supervacue, quia totus mundus post eius mortem ad fidem
conversus est.
f. Consequenter cum dicit, Veniat illi
laqueus quem etc. Ponitur poena conveniens culpae: et hoc, quia
eodem iudicio iudicantur, quo iudicare volebant: Matt. 7. In quo iudicio
iudicaveritis, iudicabimini.
Isti fraudulenter intendebant mortem ipsius, ideo Psalmista
petit contra eos, vel conformando voluntatem suam voluntati divinae, vel praenunciando.
Et petit tria, scilicet quod laqueus
eis praeparetur, quod capiantur, quod non evadant.
Quantum ad primum
dicit, Veniat illi laqueus, scilicet populo, vel ei qui principalis est
inter eos. Laqueus hic tripliciter potest intelligi.
Vel propter laqueum
poenae, quia propter mortem Christi illaqueati sunt: Isa. 8. Offendent ex
eis plurimi, et cadent, et conterentur, et irretientur, et capientur: quia
captivi sunt apud omnes gentes.
Quem
ignoraverunt, dicit, quia
nec suspicari quidem poterant talem poenam: Luc. 2. Erit enim pressura magna
super terram, et ira populo huic, et cadent in ore gladii, et captivi ducentur
in omnes gentes: Matt. 24. Erit enim tunc tribulatio magna, qualis nunquam fuit
ab initio mundi usque modo, neque fiet.
Vel de laqueo
culpae: Tim. ult. Qui volunt divites fieri, incident in tentationem, et in
laqueum diaboli; quasi dicat, Veniat illi laqueus culpae quem praevidere
non potest; quia peccatori non videtur quod sit ligatus, sed quod faciat
voluntatem suam; in veritate tamen laqueatus est, quia Prov. 5. Funibus
peccatorum suorum constringitur.
Vel de laqueo
iustitiae; quasi dicat, Veniat illi laqueus, constringens ad bonum. Quem
ignoraverunt, quia 1 Cor. 2. Animalis homo non percipit ea, quae sunt
spiritus.
Quantum ad secundum
dicit, Et captio quam abscondit apprehendat eum, idest capiatur, sicut
in abscondito me voluit capere: Prov. 5. Iniquitates suae capiunt impium.
Quantum ad
tertium dicit, In laqueum cadat, idest deiiciatur a laqueo, ut inde se
non eximat, In idipsum, idest in laqueo, quem paravit in aliis: Ps.
9. In laqueo suo humiliavit eum, inclinabit se, et cadet, cum etc. Sic
evenit Iudaeis, quia ipsi Christum gentibus tradiderunt, gentibus postmodum
traditi sunt.
g. Deinde cum dicit, Anima autem mea exultabit
in Domino, et delectabitur super etc. Ponit fructum condemnationis
impiorum.
Et ponit fructum ex parte sua duplicem. Primo exultationis
specialis. Secundo reverentiae divinae, ibi, Omnia ossa mea.
Circa primum duo facit. Primo enim ponit exultationem ex Dei
iudicio provenientem. Secundo materiam exultationis, ibi, Et delectabitur.
Dicit ergo, Peto ut sic fiat, sed cum hoc feceris, Anima
mea exultabit in Domino Iesu meo. Et ratio huius est, quia per eum adeptus
sum salutem: unde dicit, Et delectabitur super salutari suo, idest super
Christum, vel super salutem factam per Christum: Luc. 1. Exultavit spiritus
meus in Deo salutari meo. Et potest hoc referri ad ecclesiam.
Consequenter cum dicit, Omnia ossa mea, ponitur
secundus fructus, qui est reverentiae divinae: et circa hoc duo facit. Primo
enim ponit reverentiam ad Deum. Secundo rationem assignat, ibi, Eripiens.
Dicit ergo, Omnia ossa mea, Omnis fortitudo hominis
Deo comparata debilitas est: unde quanto quis plus habet de cognitione Dei,
tanto minus esse suam virtutem intelligit.
Sed quia posset credi quod illud quod infirmum est in nobis,
sit Deo incomparabile, non tamen quod est firmum, ostendit non sic esse, quia
omne quantumcumque firmum est, Deo incomparabile est. Sunt enim illa infinita,
ista vero finita; et ideo dicit, Omnia ossa mea, idest virtutes: per
ossa quippe intelligitur virtus.
Vel apostoli dicent, Quis similis tui: Iob 28. Non
adaequabitur ei aurum, vel vitrum: non commutabuntur pro eo vasa auri.
Vel ex persona dicentis, Omnia ossa mea, idest
quicquid virtuosum est in me.
Vel cognitio veritatis.
Vel fervor,
charitas et huiusmodi.
Dicit, Domine
quis similis tui, ex hoc asseritur, quod nihil est Deo comparabile.
Sed contra. Videtur quod aliquid sit simile Deo. Unde Gen.1.
Faciamus hominem ad imaginem et similitudinem nostram.
Respondeo. Dicendum. Similia dicuntur quae habent eandem formam et characterem. Sed est duplex
similitudo.
Una, quae facit
similes perfecte, quando scilicet duo participant eandem formam unius rationis.
Quaedam vero similitudo
dissimilium, quando videlicet forma invenitur in aliquo vere, et in aliquo per
remotam participationem: et sic istud est simile illi, non quia habeat eandem
formam, sed quia accedit ad hoc secundum debilem participationem.
Et sic quae de
Deo et de homine dicuntur similia, de homine dicuntur per remota; quasi dicat,
Deus est et tu, sed tuum esse est participatum, suum vero essentiale, et
similiter de aliis. Et ideo haec similitudo est dissimilium.
Et quae dicit,
manifestat per effectum. Fortis enim videtur aliquis, quando liberat aliquem
debilem a potente, hoc enim est magnae fortitudinis. Et haec facit Deus in
mundo isto.
Fortes sunt
divites: Prov. 18. Substantia divitis, urbs roboris etc. Deus autem liberat pauperes ab eis.
Divites namque primo invadunt pauperes. Secundo expoliant debiles; sed Deus ab
his liberat eos.
Quantum ad primum
dicit, Eripiens inopem, sine ope, De manu fortiorum eius.
Quantum ad
secundum dicit, Et egenum et pauperem a diripientibus eum. Egenus
dicitur quis, quasi egens necessariis; sed pauper, quasi nihil habens in pera.
Et idem sunt ista
tria, scilicet inops, egenus, et pauper: Prov. 28. Leo rugiens, et ursus
esuriens, princeps impius super populum pauperem: Ezech. 22.
Princips eius in medio illius, quasi lupi rapientes praedam.
h. Secunda pars principalis est. Superius
Psalmista petivit impiorum repulsam; hic autem assignat causam. Et primo
prosequitur eorum malitiam. Secundo petit divinum auxilium, ibi, Domine
quando respecies.
Circa primum duo facit. Primo enim ostendit eorum
iniquitatem. Secundo eorum pertinaciam in malum, ibi, Ego autem cum mihi
molesti. Iniquitatem ostendit primo quantum ad falsitatem. Secundo quantum
ad ingratitudinem, ibi, Retribuebant.
Dicit ergo quantum ad primum, Surgentes testes iniqui,
sicut principes Iudaeorum, et inducti ab eis, sicut populus quae ignorabant
scientia probationis; quasi dicat, Quae non approbabam, Interrogabant me,
quia scilicet faciebant accusationem de peccatis quae non approbabam: 1 Cor.
5. Eum qui non noverat peccatum, pro nobis etc.
Quantum ad secundum dicit, Retribuebant mihi mala pro
bonis, factis eis in veteri testamento: Mich. 6. Popule meus quid feci tibi etc. Et in novo testamento, quia
caecos illuminavit, et alia multa beneficia eis contulit: Io. 10. Multa bona
opera ostendi vobis ex Patre meo; Hier. 18. Numquid redditur pro bono malum
etc.
Et quae mala, Sterilitatem animae meae. Alludit ei
parabolae Isa. 5. de vinea quam plantavit electa, quae fecit labruscas. Populus
Iudaeorum plantatus fuit ad bonum fructum faciendum, sed sterilis factus est. Et hanc sterilitatem ostendit populus
contra animam Christi, quam expetierunt. Et ideo dicit, Sterilitatem animae meae.
i. Supra Psalmista praemisit Iudaeorum
nequitiam; hic autem ostendit eorum pertinaciam, qua perdurant in malo. Et
reprobatur pertinacia aliorum, ex eo quod nullo remedio reducuntur ad bonum.
Est autem duplex
remedium, quo aliqui solent revocari ad bonum. Primo per sanctitatem
eius quem persequuntur. Secundo ex divino flagello.
Primo ergo ostendit eorum pertinaciam ex eo quod non sunt
revocati per sanctitatem. Secundum, ibi, Dissipati.
Circa primum duo facit. Pro primo ponit sanctitatem suam
contra tribulationes. Secundo pertinaciam eorum in malum, ibi, Et adversum
me.
Circa primum facit tria, secundum quod sanctitas in tribus
consistit, scilicet in carnis maceratione, in spiritus devotione, et affectus
pietate.
Et haec tria ponit Psalmista per ordinem: nam primo ait de
carnis maceratione. Secundo de spiritus devotione, Et oratio mea. Tertio de affectus pietate, ibi, Quasi
proximum.
Circa primum duo facit. Quia enim caro indiget tegumento et
alimento, afflictio carnis habet fieri, vel asperitate tegumenti, vel
subtractione alimenti. Et ideo primo dicit quod affligitur tegumento aspero.
Secundo alimento subtracto, ibi, Et humiliabam.
Dicit ergo quantum ad primum, Ego autem cum mihi molesti
essent, induebar cilicio. Hic
cilicium metaphorice dicitur, si exponatur de Christo, quia non legitur
portasse cilicium. Hoc autem fit de pilis caprarum. Et in lege hircus caprarum
immolabatur pro peccato; et ideo cilicium signat peccatum. Christus ergo
dicitur portare cilicium: quia indutus est carne non peccatrice quidem, sed
habente similitudinem carnis peccati. Et nos etiam portare cilicium debemus,
idest poenitentiam de peccatis: Isa. 3. Erit pro fascia
pectorali cilicium.
Quantum vero ad secundum dicit, Et humiliabam in ieiunio
animam meam; quasi dicat, Non solum tegumento aspero afflixi carnem meam,
sed et alimento, dum illud a me subtraxi ieiunando. De ieiunio corporali
Christi habetur Matt. 4.
Potest etiam dici de spirituali ieiunio Christi. Christus
enim desiderabat salutem humanam. Haec est illa aqua, quam petiit a Samaritana,
Io. 4. Et in cruce ait, Sitio, Io. 19. Sed ieiunabat ad hoc, quia invenit homines
longe a salute.
Si autem dicatur in persona iusti, tunc dupliciter potest
intelligi. Uno modo, quod ieiunium sit causa humilitatis in iusto: et per
animam intelligatur via carnalis, ut sit sensus, Humiliabam etc. idest
superbiam carnalis vitae humiliabam macerando eam: Ps. 93. Genua mea
infirmata sunt etc. Iudi. 8.
Humiliemus illis animas nostras in spiritu etc.
Item potest dici,
quando humilitas est socia ieiunii, quia quando ieiunio non iungitur humilitas,
illud ieiunium non est Deo acceptum: Isa. 58. Quare ieiunavimus, et non
aspexisti etc. Quando vero humilitas ieiunio iungitur, tale ieiunium
est Deo gratum. Et ideo dicit, Humiliabam in ieiunio.
Sed quia nihil valet humiliare carnem nisi impinguet
spiritum et confortet, hostis enim debilitandus est, et pugnator fortificandus,
spiritus autem confortatur per orationem; ideo addidit, Et oratio mea in
sinu meo convertetur: Tob. 12. Bona est oratio cum ieiunio.
Oratio est speciale praesidium in tribulatione: Iac. ult.
Tristatur aliquis vestrum, oret aequo animo, et psallat: Ps. 76. Renuit
consolari anima mea, memor fui etc.
Sed dicit, In sinu meo convertetur. Si de Christo
accipiatur, intelligitur dupliciter. Uno modo, ut referatur ad Deum quem
adorat: quia ad Patrem in cuius sinu erat: Io. 1. Unigenitur filius qui est in sinu Patris.Alio
modo, ut referatur ad illos pro quibus orabat, quia orabat pro his, qui erant
in sinu Christi.
Sinus autem
Christi est secretum Dei, et hoc est propositum praedestinationis: unde pro praedestinatis
orabat Io. 17. Ego pro eis rogo, non pro mundo. Si autem
referatur ad iustum aliquem qui orat pro alio, non semper obtinet pro eo: Hie.
7. Tu ergo noli orare pro populo hoc etc., quia scilicet peccata eius non
merentur exaudiri. Tamen exauditur pro seipso, cum oratio sua efficitur
meritoria; unde, In sinu, idest ad me ipsum: Io. 10. Pax vestra ad
vos revertatur.
j. Sed verum est quod praedicta utilia sunt, parum
tamen valent nisi habeat aliquis pium affectum ad proximum; et ideo subiungit, Quasi
proximum.
Affectus autem ad proximum ostenditur in duobus, scilicet in
complacentia boni alterius, et in displicentia mali: Rom. 12. Gaudete cum
gaudentibus, et flete cum flentibus. Primum ostendit cum dicit, Quasi
proximum. Secundum cum subdit, Quasi lugens.
Dicit ergo quantum ad primum, Quasi proximum. Haec
constructio est mirabilis, quia non habent hi accusativi, unde regantur.
Glossa, Casus pro casu ponitur, accusativus scilicet pro ablativo; quasi
dicat, Sic complacebam mihi in eis, quasi in proximo et in fratre.
Vel secundum Hieronumum, et de est hic unum Ad: sic
enim habet Hieronumus, Quasi ad amicum et quasi ad fratrem meum.
Vel dicitur, Quasi sic complacebam, Deo, habens me ad
eos, sicut ad proximos, ad fratres: Iudaei namque fuerunt proximi Christo, quia
cum eis conversabatur: Baruch 3. Post haec in terris visus est, et cum hominibus conversatus est. Fuerunt et fratres eius per originem: Rom.
9. Ex quibus Christus secundum carnem: Io. 4. Salus ex Iudaeis est. Sed Iob
30. Frater fui draconum, et socius struthionum.
Quantum ad
secundum, scilicet displicentiam in malis, dicit, Quasi lugens etc. Hoc
maxime fuit in Christo Luc. 19. quando flevit super civitatem.
Et dicit, Lugens.
Luctus enim est planctus pro mortuis. Tunc ergo homo luget pro aliis,
quando plorat mala eorum, quae ipsi non sentiunt velut morui. Peccatores namque
in peccatis mortui sunt, nec sentiunt mala sua; sed iusti inde dolent ex
compassione: Hier. 9. Quis
dabit capiti meo aquam
etc.
Aliquando etiam
dolet quis pro malis alicuius, quae et iam in se sentit. Et hoc est
contristari. Unde Hieronymus habet pulchrius, Quasi lugens mater tristis
incurvabar, scilicet super eos; quasi dicat, Dolebam de eis, sicut si essem
eorum mater.
k. Hanc ergo sanctitatem affectus ostendi
eis per quam debuissent converti, sed amplius obstinati sunt; quia, Et
adversum me laetati sunt et convenerunt.
Et circa hoc duo facit. Primo posuit eorum malitiam. Secundo
suam patientiam, ibi, Et ignoravi. Circa primum tria facit. Ponit enim
tria, quae in Christi passione fuerunt. Primo ponitur Iudaeorum in malo
iucunditas. Secundo eorum consensus in malum, ibi, Et convenerunt. Tertio
dura Christi afflictio, ibi, Et congregata sunt etc.
Dicit ergo, Adversum me laetati sunt, insultando in
morte: Thren. 1. Omnes
inimici mei audierunt malum meum. Lactati sunt etc.
Contra quod dicitur Prov. 24. Cum exciderit inimicus tuus, ne gaudeas etc.
Et convenerunt etc. Ecce consensus eorum in malum.
Convenerunt enim principes in mortem Christi ad invicem, et cum plebe, et
Iudaei cum gentibus: Ps. 2. Astiterunt reges terrae, et principes
convenerunt in unum.
Et congregata
sunt super me flagella. Ecce
afflictio Christi dura: quia a Iudaeis et gentibus caesus fuit: Thren. 2. Multi
gemitus mei etc. In Hebraeo habetur, Congregati sunt super me
flagellantes.
Deinde cum dicit,
Et ignoravi, ostenditur patientia Christi: quia, Ignoravi, idest
ad modum ignorantis me habui, tacendo scilicet, et non loquendo: Ps. 17. Ego
tamquam surdus non audiebam etc. Isa. 53. Sicut ovis ad
occisionem ducetur etc. Hier. 11. Ego quasi agnus mansuetus qui portatur
ad victimam, et non cognovi etc.
Vel, Ignoravi, secundum aestimationem eorum: quia eis
videbar quod nescirem consilia eorum.
Alia litera habet, Ignorabant. Ignorabant enim tria, scilicet quem flagellarent,
quia si cognovissent, numquam Dominum gloriae crucifixissent, 1. Cor. 2.
Item causam quare: Io. 18. Si male locutus sum,
testimonium perhibe de malo; si autem bene, cur me caedis.
Item effectu
iniquitatis: pro hac enim perpetuo sunt privati: Luc. 21. Et ita populo
huic.
l. Secundo cum dicit, Dissipati sunt, nec
compuncti, ostendit, quod non sunt revocati, nec mutati ad bonum per
secundum remedium, quod est flagellum divinum: et circa hoc tria facit. Primo
enim ostendit malum quod patiebantur. Secundo defectum compunctionis ipsorum,
ibi, Nec compuncti. Tertio eorum obdurationis effectum, ibi, Tentaverunt
me etc.
Dicit ergo, Dissipati sunt. Hoc dupliciter exponitur:
et primo sic, Dissipati sunt, idest corde stupefacti, dum nescirent
rationem eorum, quae fiebant, idest miraculorum in passione: quia Matth. 27. Multa corpora sanctorum, quae
dormierunt, surrexerunt: et exeuntes de monumentis venerunt in sanctam
civitatem, et apparuerunt multis. Obscuratus est sol etc. Unde revertentes percutiebant pectora sua.
Vel, Dissipati, idest divisi: quia Io. 7. Alii dicebant, quia bonus est, alii autem
dicebant, non, sed seducit turbas. Et non sunt compuncti, idest conversi ad poenitentiam. Et hoc
patet per effectum, quia tentaverunt me dicentes Io. 10. Si tu es Christus,
dic nobis palam.
Vel ad passionem Christi non sunt conversi. Nam post mortem
ipsius adhuc insultabant ei, dicentes verba blasphemiae contra Christum, quia
dicebant verba irrisionis: Matth. 27. Vah qui destruis templum Dei etc.
Et quantum ad hoc
dicit, Subsannaverunt me. Subsannatio est irrisio quae fit rugato
naso: Isa. 37. Cui
exprobrasti, et quem blasphemasti, et super quem exaltasti vocem tuam etc.
Item verba
indignationis: Matth. 27. Recordati sumus, quia seductor hic dixit adhuc
vivens. Et quantum ad hoc dicit, Frenduerunt etc. Hoc est aprorum
qui crudeles sunt, sic et Iudaei: Thren. 2. Frenderunt dentibus, et
dixerunt: devorabimus.
m. Supra Psalmista ex person Christi, vel
iusti, nequitiam persecutorum et pertinaciam ostendit; hic autem contra
utrumque invocat Deum.
Et primo petit
divinum auxilium. Secundo ostendit divini auxilii fructum, ibi, Confitebor.
Circa primum duo facit. Primo petit accelerationem. Secundo ipsum auxilium, Restitue.
Dicit ergo, Domine quando respicies. In hoc ergo
auxilii accelerationem exprimit et affectum animi non valentis amplius pati
moram, quasi in anxietate positi. Et ideo dicit, Domine quando respicies, hoc
est enim proprie non ferentis moram: Ps. 41. Quando veniam, et apparebo ante
faciem Domini?
Et potest hoc
dupliciter intelligi, secundum quod duplex est respectus Dei. Unus est misericordiae quoad iustos
ad salutem: Sap. 4. Gratia Dei et misericordia eius in sanctos eius, et respectus eius in
electos illius.
Alius est quoad
malos ad puniendum: Iudith 9. Respice castra Assyriorum nunc sicut castra
Aegyptiorum videre dignatus es, quando post servos tuos armati currebant.
Et de utroque
respectu potest intelligi si de Christo exponatur, Domine quando respicies,
me, ut resuscites me. Respice et exaudi me Domine Deus meus. Illumina oculos
meos, ne unquam obdormiam in morte, ne quando dicat inimicus meus, praevalui
adversus eum.
Vel, Quando
respicies, super adversarios meos: Abac. 1. Quare respicis super
iniquitates, sive inique agentes, et taces devorante impio iustiorem se.
Deinde cum dicit,
Restitue, ipsum auxilium quod petit, exponit; et in hac petitione dat
duo intelligere, primo scilicet necessitatem, quam patiebatur. Secundo
malitiam adversariorum, ibi, A malignitate.
Dicit ergo quantum ad primum, Restitue, quia
necessitas grandis est, nam periculosa res est, quia in periculo animae. Restitue,
inquam, animam meam, corpori scilicet a quo separata fuit in morte, licet a
divinitate non fuerit separata: Io. 10. Potestatem habeo ponendi animam meam
etc.
Hoc poterat potentia divinitatis, quae non est alia quam
potentia Patris: unde ita facit a se quicquid facit, quod tamen habet a Patre.
Hoc etiam dicat quilibet vir iustus, quando est in periculo,
vel corporali, vel spirituali; quasi dicat, Libera me a periculis.
Malitia hostium duplex. Primo quantum ad fraudulentiam: unde
dicit, A malignitate eorum, quia malitiose contra me procedunt: Io.
2. Vicistis malignum.
Item quantum ad crudelitatem, Et a leonibus, unicam meam,
quia anima unica liberatur a leonibus, idest a daemonibus vel tyrannis: Ps.
56. Animam meam eripuit de medio catulorum leonum: Ecc. A rugientibus
praeparatis ad escam.
n. Hic ponit fructum auxilii. Et primo
ex parte sua. Secundo ex parte hostium, ibi, Non supergaudeant. Tertio
ex parte iustorum, ibi, Exultent.
Fructus ex parte liberati est laus Dei; unde dicit, Confitebor
tibi, et laudabo te, quia liberasti me: Ps. 65. Reddam tibi vota mea etc.
Et si referatur
ad Christum, fructus resurrectionis Christi est instructio ecclesiae, et fides
qua ecclesia confitetur Deum: Rom. 10. Corde creditur ad
iustitiam, ore autem confessio fit ad salutem.
Vel describitur ecclesia ex multitudine credentium. Secundo
ex virtute eorum.
Quantum ad primum dicit, In ecclesia magna, quidem
numero et diffusione terrarum: Malach.1. Magnum est nomen tuum in gentibus.
Item magna constantia et virtute, quia portae inferni non
praevalebunt adversus eam, Matth. 16. Ps. 36. Annuntiavi iustitiam tuam in
ecclesia magna.
Quantum ad secundum dicit, In populo gravi laudabo te.
Gravitas quandoque sumitur in bono, quandoque in malo, quia similitudinarie est
duplex proprietas in corporali gravitate.
Una est ponderositatis, quae tendit deorsum, et haec est
mala: quia homo dicitur gravis, secundum quod ad terrae ponderositatem et
similitudinem tendit: Ps. 4. Filii hominum usquequo gravi corde? Isa. 1.
Populo gravi iniquitate, semini nequam, filiis sceleratis.
Alia proprietas est stabilitas, quae opponitur levitati, et
non commovetur. Levis homo dicitur, qui movetur omni vento: Eph. 4. Qui
stabilis in bono est, dicitur gravis: 1. Cor. 10. Epistolae graves sunt et fortes. Hieronymus habet, In
populo forti laudabo te.
Non supergaudeant mihi inimici mei. Hic ponitur
fructus ex parte hostium: ubi petit quod eorum exultatio reprimatur. Et primo proponit hunc fructum. Secundo
ponit radicem insultationis, ibi, Adversantur. Tertio ponit radicis
commotionem, ibi, Vidisti Domine.
Dicit ergo, Non
supergaudeant; quasi dicat, Peto restitui; Ut non supergaudeant mihi,
quasi vincentes me. Et hoc quia Christo resuscitato eorum gaudium versum est in
confusionem.
Vel, Non
supergaudeant mihi, in membris meis, quae non sunt gravia, quia
sustentantur per Christum: Mich. 8. Non laeteris inimica mea.
Qui
adversantur. Hic ponit
causam insultationis. Causa et radix insultationis est triplex. Ex parte
cordis, operis, et oris.
Ex parte operis, Illi
supergaudeant qui adversantur inique. Si pro iustitia adversarentur, et
supergauderent, bonum esset et iustum; sed quia inique gaudent, indecens est: Ps.
35. Iniquitatem meditatus est in cubili suo.
Ex parte cordis
est odium indebitum; unde dicit, Et qui oderunt me gratis, idest sine
causa: Ps. 119. Dum loquebar illis, impugnabant me gratis: Io. 13. Ut impleatur
sermo, qui in lege eorum scriptus est, Quia odio habuerunt me gratis: Ps. 34. Retribuebant
mala pro bonis.
Item odium simulantium, quia cum odio cordis, Annuunt
oculis. Hoc dupliciter. Uno modo, ad ostendendum palliationem odii, quasi
annuentes quod diligerent.
Vel annuebant
sibi invicem oculis, concitantes se ad malum: Prov. 6. Homo
apostata vir inutilis.
Ex parte oris dupliciter. Primo quantum ad verba
fraudulenta. Secundo quantum ad irrisoria.
Quantum ad primum dicit, quod in ore. Secundo, quod in
corde, In ore verba pacis: unde dicit, Quoniam mihi quidem pacifice
loquebantur: Mar. 22. Scimus quia verax es: Ps. 27. Loquuntur pacem proximo
suo, mala autem in cordibus eorum.
In corde habebant
dolos, idest verba dolosa: Hier. 9. Sagitta vulnerans eorum
lingua, dolum locuta est. Et hoc, In iracundia terrae, dolos cogitabant,
idest habentes iram contra me pro terrenis: Io. 11. Ne forte veniant Romani
etc. Hieronymus habet, In rapina terrae verba irrisoria.
Qui irridet aliquem, duo facit: quia huiusmodi verba
molestant derisum, et laetificant irridentem; et ideo dicit, Dilataverunt
super me os suum, quasi audacter et gaudenter loquuntur malum de alio: Isa.
37. Super quem exaltasti vocem tuam, et elevasti in altitudinem oculos tuos?
Dilataverunt super me os suum. Gaudium eorum ostendit
cum dicit, Euge: interiectio congratulantis: Matth. 25. Euge serve
bone etc. quasi dicat, sibi ipsis congratulantes de victoria quam videbant
se habere de me. Et hoc quia, Viderunt
oculi mei, scilicet Christi passionem quam desideraverunt: Matth. 27.
Vah qui destruis templum Dei etc. Thren. 2. Haec est dies, quam
expectabamus, invenimus, vidimus.
o. Supra Psalmista posuit radicem
insultationis, quae fuit eorum malitia; hic autem removet illam radicem, sive
causam implorans Dei iudicium.
Circa quod tria proponit. Primo cognitionem necessariam ad
iudicium praecessisse. Secundo petit iudicium, ibi, Ne sileas. Tertio
iudicii effectum, ibi, Non dicant.
Iudex non potest
iuste ferre sententiam nisi prius instructus de facto. Hoc autem divino iudicio
non deest, quia videt ea, quae aguntur ex utraque parte; unde dicit, Vidisti,
scilicet eorum malitiam, et meam iustitiam: Hebr. 4. Omnia nuda et aperta
sunt oculis eius.
Consequenter
petit iudicium divinum. Et primo agit de iudicii dilatione, Secundo petit
processum iudicii.
Quod iudicium
differatur, procedit ex duobus, scilicet ex patienti tolerantia defectus
iniquorum, et ex hoc quod iudex non diligit eum, pro quo sententia dari debet,
et ex hoc excludit eum.
Quantum ad primum
dicit, Ne sileas, scilicet eorum malitiam, quam vidisti pertranseundo: Aba.
1. Quare respicis contemptorem, et taces conculcante impio
iustiorem se?
Quantum ad secundum dicit, Ne discedas a me, quasi
non referendo auxilium in necessitate: Osee 11. Vae eis cum recessero ab eis.
p. Hic ponit processum iudicii. Tria enim requiruntur
in iudicio. Primo, quod iudex sumat iudicandum. Secundo, quod consideret merita
causae. Tertio, quod proferat sententiam iustam.
Quantum ad primum dicit, Exurge, idest a torpore, et
assume animum iudicandi: Ps. 43. Exurge, quare obdormis Domine?
Quantum ad secundum dicit duo, quibus debet iudex intendere,
debet scilicet iudicium proferendum, et causam super quam debet sententiam
ferre; unde dicit, Intende iudicio meo, idest pro me ferendo: Ps. 71.
Deus iudicium tuum regi da etc.
Quantum ad secundum dicit, Deus meus et Dominus meus in
causam meam. Uno modo, In litem meam: Iob 29. Causam quam nesciebam,
diligentissime investigabam.
Vel, In causam, secundum quod causa idem est quod
principium, ex quo sequitur aliud; quasi dicat, Intende in causam, pro
qua ego patior. Et haec est
obedientia Patris: Phil. 2. Factus est obediens usque ad mortem etc.
Item causa est
charitas quam habuit ad nos, propter quam causam patiebatur.
Quantum ad secundum dicit, Iudica me. Una litera
habet, Secundum iustitiam tuam; alia litera habet, Iudica me secundum
iustitiam meam, primum idem est, ac si diceret, Iudica me, secundum
legem tuam et iustitiam: nam iustitia Dei est reddere unicuique secundum
merita: et quae non possunt falli et flecti a veritate, Rom. 2. Iudicium
Dei est secundum veritatem.
Secundum iustitiam meam, scilicet quam ego sum
secutus. Et potest dici quod idem est iustitia mea et tua, Dei scilicet
iustificantis, hominis quasi iustificati, quia iustitia nostra est ex Deo: Rom.
10. Volentes iustitiam suam statuere etc.
Consequenter petit effectum iudicii, Ut non supergaudeant
mihi: et circa hoc duo facit. Primo petit insultationis reprehensionem. Secundo
petit eorum confusionem, ibi, Erubescant.
Exterior exultatio nascitur ex interiori gaudio. Primo ergo
petit ut reprimatur eorum gaudium intus. Secundo exterior insultatio.
Dicit ergo quantum ad primum, Non supergaudeant mihi;
quasi dicat, Ita iudicium tuum reprimate eos, ut non gaudeant super me: Thren.
1. Omnes inimici mei
audierunt malum meum, et laetati sunt.
Quantum ad
secundum dicit, Ne dicant in cordibus suis. Insultatio in duobus fit,
sicut et gaudium. Gaudium autem vel est de praesentibus bonis, vel de bonis
futuris. Similiter insultatio, vel est propter mala iam facta, vel propter
fienda.
Primo ergo petit
removeri insultationem de praeteritis: et ideo dicit, Ne dicant in cordibus
suis, euge, euge, animae nostrae, idest non congratuletur anima eius super
aliquibus de me, Et dicant animae nostrae, devorabimus eum.
Aliquando enim
aliquis opprimit aliquem non exultatione, sed surreptione ex infirmitate: et
hoc patet quod statim poenitet. Sed quando ex malitia opprimit, tunc gaudet se
fecisse: et hoc est quod dicit, Nec dicant, devorabimus eum, scilicet in
futurum: Ps. 56. Lingua eorum gladius acutus; Abach. 3. Exultatio eorum,
sicut eius qui devorat pauperem in abscondito.
q. Hic petit eorum confusionem: et petit duo
correspondentia duobus praemissis, de quibus fit insultatio, scilicet de
factis, et fiendis. Primo petit ut confundantur de malis iam factis. Secundo
ut confundantur super futuris, ibi, Induantur confusione.
Primo ergo petit erubescentiam eorum, vel bonam confusionem,
vel aeternam: et hoc dicit per modum praenuntiationis, vel conformationis ad
Deum: Isa. 6. Servi mei
laetabuntur, et vos confundemini.
Secundo petit
eorum diffidentiam sive timorem: unde, Et revereantur simul.
Vel in bonum,
quasi incipiant Deum timere: nam timor initialis et castus proprie reverentia
dicitur; et hic timor inducit in salutem: quia, ut dicitur Eccl. Timor
Domini initium sapientiae.
Vel semper sint in timore: Sap. 17. Cum sit timida
nequitia, dat testimonium condemnata: Iob. 13. Sonitus terroris semper in auribus
eius. Et quare haec eveniant eis, quia gloriantur in malis meis.
Consequenter petit confusionem de futuro, et aliqua petit per alium modum, quia
idem est confusio quod erubescentia; et sicut illa possunt accipi in bono et in
malo, ita hic confusio et reverentia.
Sed quod additur, Induantur confusione, aliquid
addit. Indumentum enim dicit habitum. Qui ergo simpliciter et in principio
timet, non potest dici habere habitum timoris; sed qui firmantur in malo, et
desiderant malum: Hier. 17. Duplici contritione contere eos.
Et quare plus petit modo quod affligantur quam ante, quia
est maior culpa, quasi scilicet non sunt contenti his quae fecerunt, sed adhuc
maligna cogitant contra me.
Sicut Iudaei etiam post mortem Christi volebant occultare
eius resurrectionem corrumpendo custodes: Prov. 20. Verbum malignum,
vanitatem, et verba mendacia longe fac a me: Hieronumus habet, Qui
maligna loquuntur contra me: 1 Reg. 2. Nolite multiplicare loqui
sublimia, gloriantes.
r. Hic est tertius fructus, qui consurgit ex
parte divini auxilii: et hic fructus est gaudium sanctorum. Et primo ponit
fructum exultationis dicens, Exultent et laetentur.
Ponit autem pro
fructu sanctorum iucunditatem, quia laetitia dicit latitudinem cordis, unde
signat interius gaudium: Ps. 118. Dilastasti cor meum. Et haec laetitia est proprie in iustis: Ps.
96. Lux orta est iusto, et rectis corde laetitia.
Exultatio dicit
gaudium prorumpens exterius ab interiori; et haec exultatio competit iustis: Ps.
32. Exultate iusti in Domino. Et hoc competit rectis; unde dicit, Qui volunt iustitiam meam,
scilicet imitari.
Vel si dicatur ex
persona David, Volunt iustitiam meam, idest congaudent bonis meis, sic
est gaudium cordis, et ex hoc sequitur exultatio oris: Isa. 51. Gaudium et
laetitia invenientur in ea, gratiarum actio, et vox laudis. Et ideo subdit,
Dicant semper, magnificetur Dominus, idest magnificent Deum sancti.
Non enim secundum veritatem magnum faciendo, sed nuntiando,
et praedicando eum magnum: Ps. 33. Magnificate Dominum mecum etc. Eccl.
44. Admirabilis magnificentia eius.
Item ibidem: Quis magnificabit eum sicut est? et qui sunt
illi qui hoc faciunt? certe, Qui volunt pacem servi eius, scilicet
Christi secundum humanam naturam: quam pacem Christus fecit et dat, quia Ipse
est pax nostra, qui fecit utraque unum, Eph. 2. Pacem meam do vobis, pacem meam relinquo vobis,
Io. 14. Et in me pacem habetis, Io. 17.
Si autem
intelligitur dictum ex persona David, sic est sensus, Qui volunt pacem servi
eius, idest illi exultent et laetentur, qui volunt quod servus eius,
scilicet ego, habeam pacem.
Sed et
lingua mea. Hic
ostendit quod etiam ipse est particeps gaudii huius; quasi dicat, Non solum
illi qui habent gaudium, sed et ego etiam gaudii sanctorum sum particeps.
Et de hoc ponit
duo. Primo ponit interiorem meditationem. Secundo ponit interiorem
laudem.
Dicit ergo quantum ab primum, Sed et lingua mea
meditabitur iustitiam tuam.
Sed contra. Meditari non pertinet ad linguam, sed ad cor.
Et est triplex
responsio. Uno modo lingua meditatur, idest meditata loquitur: Ps.
48. Os meum loquetur
sapientiam, scilicet
meditatam. Qui est iustus, loquitur ex praemeditatione: sic et sapiens.
Alio modo est
duplex os, sive duplex locutio, scilicet interius, et exterius: Matth.14.
Quae procedunt de ore, scilicet cordis, haec sunt quae coinquinant
hominem. Et sic accipitur hic lingua, scilicet interior.
Tertio modo, sic Meditabitur,
idest decantabitur, et modulabitur, Tota die laudem tuam, idest semper
cogitabit quomodo laudet te: Ps. 33. Benedicam Dominum in omni
tempore etc.
|