a. Quando venit ad eum Nathan propheta, cum intravit ad
Bersabee.
PSALMUS DAVID
L.
Miserere mei,
Deus, secundum magnam misericordiam tuam; et secundum multitudinem miserationum
tuarum dele iniquitatem meam. Amplius lava me ab iniquitate mea, et a peccato
meo munda me.
b. Quoniam iniquitatem meam ego cognosco et peccatum meum
contra me est semper. Tibi
soli peccavi, et malum coram te feci, ut iustificeris in sermonibus tuis, et
vincas cum iudicaris.
c. Ecce enim
in iniquitatibus conceptus sum, et in peccatis concepit me mater mea. Ecce
enim veritatem dilexisti.
d. Incerta, et occulta sapientiae tuae manifestasti mihi.
Asperges me hyssopo, et
mundabor: lavabis me, et super nivem dealbabor.
e. Auditui meo
dabis gaudium et laetitiam: et exultabunt ossa humiliata.
f. Averte
faciem tuam a peccatis meis, et omnes iniquitates meas dele. Cor mundum crea in
me, Deus, et spiritum rectum innova in visceribus meis. Ne proiicias me a facie
tua, et spiritum sanctum tuum ne auferas a me. Redde mihi laetitiam salutaris
tui, et spiritu principali confirma me.
g. Docebo
iniquos vias tuas: et impii ad te convertentur. Libera me de sanguinibus, Deus,
Deus salutis meae; et exultabit lingua mea iustitiam tuam. Domine, labia mea
aperies, et os meum annuntiabit laudem tuam.
h. Quoniam si
voluisses sacrificium, dedissem utique: holocaustis non delectaberis.
Sacrificium Deo spiritus contribulatus: cor contritum, et humiliatum, Deus non
despicies.
i. Benigne fac, Domine, in bona voluntate tua Sion, ut
aedificentur muri Hierusalem. Tunc acceptabis sacrificium iustitiae, oblationes, et holocausta: tunc
imponent super altare tuum vitulos.
a. In praecedentibus Psalmis huius decadis
videtur Psalmista egisse de his quae pertinent ad statum Regni, cuius gloriam
descripsit, et alios ad eam invitavit: nunc autem, quia gloria huius Regni
impedita est per peccatum, agit de abolitione peccati: ubi duo consideranda
sunt.
Primum quod in
ordine Psalmorum hic Psalmus est quinquagesimus; et hic est numberus iubilaeus,
ut dicitur Lev. 27 in quo fiebat remissio omnium debitorum: unde congruit hic
numerus huic Psalmo, in quo agit de plena remissione peccatorum.
Similiter quantum
ad poenitentiales iste ponitur quartus, et convenienter. Nam primus pertinet ad
cordis contritionem: unde dicit (Ps. 6) Lavabo per singulas noctes lectum
meum. Secundus
pertinet ad oris confessionem. (Ps. 31) Dixi Confitebor adversum me
iniustitiam meam Domino. Tertius pertinet ad satisfactionem: unde dicit
(Ps. 37) Afflictus sum, et humiliatus sum nimis. Hic autem quartus
pertinet ad effectum poenitentiae: in quo ostenditur quomodo poenitentia
restaurat hominem ad perfectum; et ideo inter omnes alios Psalmos inste magis
frequentatur in Ecclesia, quia iste solum implorat misericordiam, et sic
impetrat veniam; et hoc facile st, et cuilibet potest competere.
In aliis
autem sex Psalmis poenitentialibus sunt quaedam gravia, sicut (Ps. 6) Lavabo
per singulas noctes lectum meum. Et (Ps. 101) Cinerem tanquam panem
manducabam et potum meum cum fletu mescebam: quae non possunt cuilibet
competere.
Titulus
talis est: Psalmus David, quando venit ad eum Nathan propheta, cum intravit
ad Bersabee. Haec historia habetur expresse II. Regum 11. et 12. capp. Quando David erat in
prosperitate vidit mulierem lavantem se, et concupivit eam, et adulteravit, et
fecit occidere virum eius. Et hoc displicuit Deo, et missus est ad eum Nathan
propheta, et reduxit eum in detestationem sui peccati, sub similitudine ovis
perditae. Et David dixit: "Peccavi Domino." Et dimissum est ei
peccatum. Et haec est materia huius Psalmi, scilicet dimissio peccati.
Sed sciendum est
in titulo huius Psalmi, quod David in aliis Psalmis loquitur de aliis; sicut
ibi (Ps. 21) Deus Deus meus, loquitur praenuntians passionem Christi; et
sic in diversis Psalmis loquitur de diversis. Sed istum Psalmum propter seipsum
fecit: in quo ostendit culpam, quam fecit mundo manifestam, et similiter
veniam; et sic implerunt illud quod Dominus dixit 2. Reg. 12. "Tu
fecisti hoc in occulto; et ego facima illud manifestum."
Ratio autem huius manifestationis est divina misericordia.
Nam utilis est iustis haec manifestatio, ut non praesumant de sua iustitia quia
si David post tot victorias, post donum Spiritus sancti, post tantam
familiaritatem cum Deo, et prophetiam peccavit; quantum debemus cavere nos, qui
fragiles, et peccatores sumus? 1.
Cor. 10. "Qui se existimat stare, videat ne cadat." Item utilis est
peccatoribus, ut non desperent. Prov. 24. "Si desperaveris lapsus,
in die angustiae imminuetur fortitudo tua." Nam David post homicidium, et
adulterium recuperavit gratiam prophetiae.
Notandus est autem modus loquendi in titulo: Quando
venit: ubi designat veniam, de qua agitur in Psalmo, quia per eum audivit
eum Dominus, et transtulit peccatum illius; sed cum dicit, Quando intravit
ad Bersabee designatur culpa. Ubi duo ostenta sunt. Primum quod nominat culpam, cum dicit, Et
intravit. Ps. 11. "Eloquia Domini eloquia casta."
Item cum commisisset duo peccata, scilicet adulterium, et
homicidium, Scriptura nominavit adulterium tantum; et hoc propter duo. Primum ut designet quod in scrutandis, et
publicandis peccatis aliorum non simus prompti, sed valde parci. Prov.
24. "Ne insidieris, ut quaeras impeitatem in domo iusti." Et hoc signatur Matth. 25. ubi Dominus
merita bonorum enumerat diligenter, demerita malorum transiit. Item adnotandum,
quod quando quis facit duo peccata, et unum facit propter aliud, unum transit
in speciem alterius; sicut qui committit furtum ut fornicetur, dicitur potius
fornicator.
Dividitur autem
iste Psalmus in duas partes: primo enim implorat misericordiam; secundo
promittit emendam, ibi, Docebo iniquos. Circa primum duo facit. Primo
petit culpae relaxationem; secundo petit sanctitatis, et gratiae
restaurationem, ibi, Quonima iniquitatem.
Petit ergo primo misericordiam Dei, cum dicit: Miserere
mei, Deus. Ubi sciendum est,
quod, sicut dicitur Prov. 14. "miseros facit populos peccatum." Sicut
enim non est vere felix qui abundat divitiis, fruitur voluptatibus, pollet
honoribus, sed qui fruitur Deo; ita non est miser qui est pauper, miser, et
debilis, et infirmus, sed qui est peccator: et ideo iste qui est peccator,
dicit: Miserere mei, Deus, tu scilicet qui "misereris omnium, et
nihil odisti eorum quae fecisti:" Sap. 11. et secundum Apostolum misereris
cui vis. Rom. 9. "Miserebor cui voluero." Ergo si voluntati
tuae subest misereri, Miserere mei, scilicet peccatoris.
Non vult contendere, non quaerit disputare, sed brevi utitur
via, Miserere. Item non allegat misericordiae causam, non servitia quae
fecit Deo, non periricula quae sustinuit pro eo; sed solum Dei misericordiam
implorat: unde dicit: Secundum magnam misericordiam tuam. Dan. 9.
"Non in iustificationibus nostris prosternimus preces ante faciem tuam;
sed in miserationibus tuis multis."
Et notandum, quod aliquis potest sperare de misericofria
divina, duplici ratione. Una ratio est ex consideratione, et secundum
multitudinem effectuum eius.
Primo ergo ostendit quod sperat de misericordia Dei, ex
consideratione naturae divinae, quia naturae divinae proprium est quod sit ipsa
bonitas. Unde Dionysius dicit, quod
Deus est ipsa substantia bonitatis. Et Boethius de Trin. similiter. Unde
nihil aliud est haec Dei misericordia, nisi bonitas relata ad depellandam
miseriam. Ergo cum considero quod bonitatis miseriam repellere est proprium, et
tamen est ipsa bonitas, confidenter ad misericordiam recurro.
Et dicitur magna, sua incomprehensibilitate, qua implet
omnia. Ps. 32. Misericordia Domini plena est terra.
Et in omnibus habet locum, Nam iusti innocentiam servaverunt
propter misericordiam Dei. Augustines: "Domine, gratiae tuae deputo mala
quae non feci."
Item peccatores sunt conversi ad iustitiam propter Dei
misericordiam. 1. Tim. 1.
"Misericordiam consecutus sum."
Item in
peccato existentes misericordiam Dei experti sunt. Tren. 3. "Misericordiae
Domini multae quod non sumus consumpti."
Item dicitur magna sublimitate, quia miserationes eius
super omnia opera eius.
Nam misericordia non signat in Deo passionem animi, sed
bonitatem ad repellendam miseriam. Item magna, duratione. Is. 34. "In
misericordia sempiterna misertus sum tui."
Item magna, virtute, quia Deum hominem fecit, de caelo Deum
ad terram deposuit, et immortalem mori fecit. Eph. 2. "Deus autem, qui dives est in misericordia."
Item magna per effectum, quia ex omni miseria potest homo
per misericordiam elevari. Ps. 85. Misericordia tua magna est super me, et
remisisti impietatem peccati mei (Ps. 31). Et ideo confidenter peto: Miserere
mei Deus.
Item alia ratio est, quia in omnibus a principio mundi
inveni effectus misericordiae tuae; et ideo dicit: Et secundum multitudinem
miserationum tuarum dele iniquitatem meam; quasi dicat: Miserere mei
secundum quod multipliciter, et in diversis misertus es omnibus hominibus. Unde
dicitur Isa. 63. "Miserationum Domini recordabor." Ps. 24. "Reminiscere miserationum tuarum
quae a saeculo sunt."
Dele
iniquitatem meam.
Hic ponit effectum miserendi. Nathan dixit (II Reg. 12) "Dominus
transtulit peccatum tuum: non morieris." Et sic erat securus de venia; sed
volebat totaliter peccatum extirpari. Remanet autem duplex effectus peccati:
scilicet reatus poenae, et macula in anima.
Primo ergo
petit removeri reatum poenae; et ideo dicit: Amplius lava me ab iniquitate
mea. Sciendum est quod Hier. 17 dicitur quod "peccatum Iuda scriptum
fuit stylo ferreo in ungue adamantino:" ad similitudinem iudicis qui
scribit culpam, quae tamdiu servatur script quamdiu habet animum puniendi. Sed
si deponit hunc animum, non servat scripturam. Et sic scriptum stylo adamantino
dicitur quando peccatum non deletur. Et hoc est quod dicit: Dele iniquitatem
meam; idest, non imputes mihi iniquitatem ad poenam. Is. 43. "Ego sum
qui deleo iniquitates vestras." Item Ibid 44. "Delevi ut nubes iniquitates tuas, et quasi nebulam
peccata tua."
Amplius. Hic petit removeri immunditiam culpae.
Homo qui habet mentem bene dispositam plus abhorret immunditiam culpae, quam
austeritatem posenae, et ideo dicat: Amplius lava me, quasi dicat: Peto
ut deleas poenam; sed amplius peto quod mundes maculam.
Vel amplius lava, quam eog intelligo. Ro. 8. "Nam quid oremus sicut oportet
nescimus." Eph. 3. "Et qui potens est omnia facere superabundanter
quam petimus, aut intelligimus."
Duo susnt necessaria
ad removendum maculam; scilicet ablutio praecedens, et munditia sequens. In
corporibus ablutio fit per aquam; et sic secundum Glossam Psalmus per aquam
praefigurat virtutem baptismi, qua Deus dimissurus erat peccatum. Ezec. 36.
"Effundam super vos aquam mundam, et mundabimini ab omnibus inquinamentis
vestris." Zach. 13.
"Erit fons patens domui David in ablutionem peccatorum, et
menstruatae." Et licet
baptismus nondum institutus esset, tamen virtus Dei lavans erat in baptismo. Ergo
Lava me ab iniquitate mea. Hierem. 4. "Lava a malitia cor tuum,
Hierusalem, ut salva fias."
Item peto ut mundes me a peccato, quia nullus mundatur nisi
a te. Iob. 14. "Quis potest
facere mundum de immundo conceptum semine?" Eccli. 34. "Ab immundo
quis nundabitur?" Et dicit duo, scilicet iniquitatem, et peccatum.
Iniquitas est contraria iustitiae; peccatum vero munditiae, et hoc est
adulterium. Et sic iniquitas fuit inquantum laesit alium per homicidium; sed
peccatum est per adulterium in quo se polluit.
b. Quoniam. Hic confitetur culpam: et
primo confitetur culpam; secundo ostendit hanc confessionem esse Deo acceptam.
Primo ergo confitetur culpam; secundo ipsam culpam exaggerat, ibi, Tibi soli
peccavi; tertio eius originem demonstrat, ibi, Ecce enim.
Recognoscit ergo culpam suam dicens, Quoniam iniquitatem.
Quidam sunt qui peccata sua non cognoscunt propter tres causas. Quia aggravatur
ratio ex gravitate peccati. Prov. 18. "Impius cum in profundum peccatorum
venerit, contemnit." Ps. 39. Comprehenderunt
me iniquitates meae, et non potui ut viderem.
Item quia non recordantur. Eccli. 5. "Oblitus est
deliciarum suarum."
Item propter adulationes hominum. Ps. 9. Laudatur
peccator in desideriis anima sua.
Et ideo quia alii laudant eum de peccatis, ipse non
recognoscit. Sed felix qui peccatum suum recognoscit sicut David. Prov. 14.
"Cor quod novit amaritudinem animae suae, in gaudio eius non cognoscetur
extraneus."
Quantum ad secundum dicit: Et peccatum meum contra me est
semper. Quidam sunt qui etsi cognoscant peccatum suum, tamen non
detestantur; sed iste semper peccatum suum contra se habet ut contrarium, et
nocivum et detestabile. Et dicit, Semper.
Quidam sunt qui ad horam detestantur peccatum. Iac. 1: "Consideravit se, et abiit, et statim
oblitus est qualis fuerit." Isa. 38: "Recogitabo tibi omnes annos
meos in amaritu animae meae." Psalmus: Iniquitatem meam ego cognosco.
Alia littera, Coram
me; et sic designatur quod recognoscit culpam, quod continue meditatur de
ea. Et hoc statutum est coram eo per Nathoan prophetam sub similitudine.
Tibi soli peccavi. Supra Psalmista posuit
recognitionem propriae culpae; hic autem exaggerat culpam suam; et circa hoc
duo facit. Primo exaggerat ipsam; secundo ponit id quod ad exaggerationem
consequitur, ibi, Ut iustificeris. Hanc culpam exaggerat per respectum
ad Deum, et dupliciter, ut dicitur Hier. 29. "Ego ero iudex, et
testis." Videtur autem Deum iudicem contemnere qui non timet peccare
propter iudicium eius. Et similiter contemnit Deum testem qui peccat in oculis
eius; et ideo dicit: Tibi soli peccavi.
Sed numquid non peccavit contra Uriam quem occidit? Sic; sed
dicit, Tibi soli; id est Deo, quia ipse non est obnoxius famulo suo, sed
sententiae Dei. Cum enim peccat dominus, qui est super servum, non peccat
servo, sed Deo. Sap. 6. "Potestas vobis data est a Domino, et virtus ab
Altissimo, qui interrogabit opera vestra, et cognitationes scrutabitur."
Vel tibi soli, idest per comparationem ad te solum
peccavi: et potest hoc referri sive ad Deum, sive ad Christum. Deo dicitur
peccare per comparationem ad iustum; et sic, Tibi soli peccavi, quia
solus es sine peccato. Et similiter
Crhistus omnino fuit sine peccato. Tibi ergo soli peccavi,
contemnendo iudicium tuum. Item contempsi te testem, quia malum coram te
feci: vidente et praesente feci. Prov. 15. "Infernus et perditio coram
Domino; quanto magis corda filiorum hominum?" Eccli. 23. "Oculi
Domini multo lucidiores supra solem."
Ut iustificeris. Hic ponitur quod consequens est ad
istam exaggerationem; et hoc potest multipliciter legi: sed primo quod magis
videtur dicam. Ut enim quandoque ponitur causaliter, quandoque consecutive
tantum; et tunc est eius sensus: Malum coram te feci, ut iustificeris tu,
quia nullus propter peccatum iustificatur; sed hoc consequitur ex peccato, quia
ex hoc ipso quod homo peccat, iustitia Dei manifestior redditur.
Nam ex peccatis
eius apparuit quod eum Deus punivit. Haec autem punitio consistit in
duobus. Primo comminatur; secundo infert poenam; et in utroque est iustus.
Quantum ad primim dicit, In sermonibus, quibus poenam comminaris. Prov.
8. "Iusti sunt sermones mei." Quantum ad secundum dicit, Vincas,
cum iudicaris; idest cum aliis in iudicio compararis. Frequenter Deus ad
ostendam suam iustitiam et nostram etiam vult nobiscum iudicari. Isa. 5.
"Iudicate inter me et vineam meam." Et in hoc Deus iustior invenitur.
Iob. 9. "Si contendere cum Deo voluerit, non poterit et respondere unum
pro mille."
Et quod haec sit
intentio Psalmi, patet ex Apostolo Rom. 3. "Est autem Deus verax, omnis
homo mendax, sicut scriptum est."
Sed in glossa,
loquitur, ut hoc quod dicitur, Iustificeris in sermonibus suis, et vincas
cum iudicaris, non continetur cum Malum coram te feci; sed cum hoc
quod dicit, Tibi soli, idest ad tui comparationem, qui solus es iustus,
et intantum quod omnes sermones tui iusti. Et sic Ut ponitur causaliter;
quasi dicat: Intantum es iustus ut iustificeris.
Vel si referatur
ad Christum, sic est sensus: Tibi soli, scilicet Christo, peccavi,
quia es iustus, et vincas omnes homines, cum iudicaris, licet
iudiceris a Pilato.
Vel aliter: Ut
iustificeris in hoc, amplius peto ut laves me, ad hoc ut iustificeris;
scilicet, promissiones nostrae perfecte verae sint, scilicet de Christo
nascituro; cui promissum est (Ps. 131) De fructu ventris tui ponam super
sedem tuam. Et quod peccatum remitteretur. II. Reg. 12. "Dominus
transtulit tibi peccatum tuum." Et vincas cum iudicaris, ab
hominibus, quod non debeas implere promissa, et non debeas delere peccata mea.
c. Ecce enim. Hic ponit radicem culpae. Radix omnis culpae actualis est peccatum
originale, quod a parentibus contrahitur infectis illo peccato. Haec infectio
erat in patre ipsius David, et in matre. Qauntum ad patrem dicit: In
iniquitatibus conceptus sum, non actualibus, quia non de adulterio, sed de
matrimonio, et sancto Iesse natus, sive generatus est, ut dicitur Ruth ultimo;
sed in originali: nam in hoc peccato omnes nascuntur. Rom. 5. "Per unum
hominem in hunc mundum peccatum intravit."
Sed cum originale
sit unum, quare dicit: In iniquitatibus conceptus sum?
Dicendum est, quod peccatum originale est unum is essentia,
ut sic dicatur, multa tamen in virtute: quia occasionem praebet ad omnia alia
peccata. Rom. 7. "Peccatum quod est in carne mea operatur." Et hoc
diminuit culpam; quasi dicat: Non est mirum si pecco, quia in eis conceptus
sum.
Quantum ad matrem dicit: Et in peccatis concepit me mater
mea.
Sed numquid non erant mundati parentes David per
circumcisionem ab originali peccato?
Dicendum est, quod baptismus, et circumcisio mundat animam a
culpa originali, sed adhuc ramanet fomes; et circumcisio fiebat in carne, et
homo generat filios carnales secundum carnem: et ideo necesse erat quod iterum
filius natus circumcideretur; sicut modo natus ex parentibus baptizatis
baptizatur.
Alia littera habet: Alit me mater mea. Et hoc ad
actualia peccata refertur; quia etiam in pueris inordinati motus inveniuntur,
ut Augustinus in 6 Confessiones dicit.
Alia littera habet: Peperit me mater mea. Et sic quia
quidam sanctificantur in utero; sed omnes praeter Christum concipiuntur in
originali; ideo dicit quod non est sanctificatus in utero, sed natus in
originali.
Ecce enim veritatem dilexisti. Qui vult satisfacere,
debet diligere ea quae Deus diligit; Deus autem diligit veritatem fidei. Io. 18. "Omnis qui est ex veritate,
audit vocem meam." Item
iustitiam. Ps. 88. Misericordia, et meritas praecedent faciem tuam.
Et hae necessaria est in poenitente, ut in se puniat quod deliquit.
Item est necessaria confessio, ut confiteatur peccata.
d. Incerta. Hic petit totaliter reparationem: et primo ponit
spem quem habet: secundo petitionem. Et primo ponit acceptum beneficium,
per quod erigitur in spem; secundo ponit suam fiduciam, ibi, Asperges me.
Commemoravit beneficium potentiae, cum dixit, Incerta, et
occulta: qui scilicet Rex habui beneficium prophetiae. II Reg. 23.
"Spiritus Domini locutus est per me; et sermo eius per linguam meam."
Et ponit tria: scilicet materiam
prophetiae, modum, et causam.
Materiam
prophetiae ostendit cum dicit, Incerta, et occulta. De his est prophetia;
scilicet, incerta, et occulta, quae per sapientiam tuam comprehenduntur. In
nobis est aliquid ignotum dupliciter, quod tamen est Deo notum. Aut propter
defectum est nobis aliquid ignotum, aut propter excessum.
Propter defectum
est nobis ignotum aliquid futurum contingens: quia nundum habet determinatam
veritatem.
Propter excessum
est nobis ignota divina substantia, et quae excedunt capacitatem nostram.
Utraque autem fuerunt revelata David per spiritum prophetiae. Amos 3. "Non
facit Dominus Deus verbum, nisi revelaverit secretum suum ad servos suos
prophetas."
Incerta ergo manifestasti mihi, idest illa
quae de sui natura habent variabilitatem; et haec fuerunt sibi revelata; ut
patet in Psalmo. Occulta vocantur quae excedunt oculum mentis naturae. Iob 28.
"Sapientia trahitur de occultis." Eccli. 24. "Ego in altissimis
habitavi, et thronus meus in columna nubis."
Et haec subsunt sapientiae Dei; quasi dicat: Licet nobis
sint occulta, tamen a sapientia tua comprehenduntur; et inter occulta
commemorat mysterium incarnationis, quod etiam manifestasti mihi.
Item misericordia Dei inter ista annumeratur, quia remittit
peccata. Sed melius est ut
accipiatur universaliter. Modus revelationis ponitur cum dicit, Manifestasti
mihi.
Triplex est modus
prophetiae. Unus in quo revelatur supernaturalis, et intelligibilis veritas sub
similitudinibus corporalibus, et imaginationibus, et sic dicitur Isa. 6.
"Vidi Dominum sedentem super thronum excelsum et elevatum." Alius est
in quo fit revelatio supernaturalis, et intelligibilis veritatis, absque nebula
imagintionis phantasticae, immo nondum revelatur et sic facta est revelatio
Moysi Num. 12. "Palam, et non per aenigmata, et figuras vidit Deum."
Et talis etiam
fuit revelatio David II Reg. 23. "Deus Israel locutus est mihi." Et
infra: "Sicut lux aurorae mane oriente sole absque nubibus rutilat."
Asperges me
hyssopo. Supra
commemoravit Psalmista Dei beneficium sibi praestitum quantum ad gratiam
prophetiae, ex quo consuregebat in spem; hic autem ostendit quid a Deo
sperabat. Et fuerunt duo: primo enim sperat remotionem malorum quae incurrerat
per peccatum; secundo sperat restitutionem bonorum, quae amiserat, ibi, Auditui.
Sciendum est
autem, quod homo per peccatum primo incurrit immunditiam. Hier. 1.
"Maculata es in iniquitate tua." Secundo incurrit turpitudinem. Unde
Tre. 4. "Denigrata est super carbones facies eorum." Et haec duo
sperat a se removeri; immunditiam, scilicet, et turpitudinem spiritualem.
Immunditia
contingit ex hoc quod affectus hominis inhaeret rebus temporalibus, quibus
similis efficitur: unde si adiungatur vilioribus, ut aurum plumbo, vilis
efficitur. Os. 9. "Facti sunt abominabiles sicut ea quae dilexerunt."
Sed turpitudo ex
eo quod inhaeret rebus terrenis, quibus obscuratur in eo lux rationis, quia
comparatur animalibus brutis. Ps. 48. Homo cum in honore esset non
intellexit, comparatus est iumentis insipientibus, et similis factus est illis.
Et ideo anima
efficitur nigra, sive obscura: et ideo quantum ad primum dicit: Asperges me
hyssopo: ubi alludit ritui veteris testamenti. Num. 19. ubit tertio die
aspergebatur immundus aqua lustrationis, et die septimo lavabatur aqua, et
vestimenta etiam lavabantur; aqua lustrationis fiebat de hyssopo.
Et ideo dicit: Asperges
me hyssopo. Et illa aqua fiebat ex cinere vitulae rufae, per quam
figurabatur Christus. Unde per illam aspersionem quam petit signatur aspersio
sanguinis Christi. I
Pet. 1. "In aspersionem sanguinis Christi." Heb. 12. "Accessistis ad montem." Et
infra: "Et sanguinis aspersionem melius loquentem quam Abel."
Hoc fiebat
cum hyssop. Hyssopus est herba quae terrae inhaeret, et curat inflationem, ut
in Glossa dicitur: et convenit fidei quae humilitatem habet: quia per fidem
subiicitur intellectus Deo. II Cor. 10. "In captivitatem redigentes omnem
intellectum in obsequium Christi."
Item radicata est
in petra, id est Christo. Matth. 16. "Super hanc petram aedificabo
Ecclesiam meam." Petra autem
erat Christus; II Cor. 10. "Item depellit spiritus humani elationem, quae
est in illis qui non obediunt fidei Christi." I Tim. ult. "Si quis aliter docet, et non
acquiescit sanis sermonibus Domini nostri Iesu Christi...hic non est
eius." (Rom. 8). Dicit ergo: Domine, ego habeo firmam spem, quod tu
asperges me aqua lustrationis. Ezech. 36. "Effundam super vos aquam
mundam; et mundabimini ab omnibus inquinamentis vestris."
Lavabis
me. Nam post fidem
necessarius est baptismus. Zach. 13. "Erit fons patens domui Jacob in
ablutionem peccatoris, et menstruatae." Is. 1. "Lavamini, mundi
estote." Effectus huius lavationis: Dealbabor super nivem, quia
nigredo tolletur; et hoc scilicet, quia anima erit albior nive. Is. 1.
"Si fuerint peccata vestra ut coccinum, quasi nix dealbabuntur."
Et dicit, Super nivem, quia candor animae
sanctificatae excedit omnem pulchritutidnem corporalem, ut patet Matth. 17. in
transfiguratione Christi, cuius "vestimenta facta sunt alba sicut
nix." Omnes iusti pertinet ad vestimenta Christi. Is. 49. "Omnibus
his quasi vestimento vestieris." Et per hoc designat se ad vestimentum
Christi pertinere per baptismum. "Quotquot
baptizati estis, Christum induistis" dicit Apostolus Gal. 3.
e. Audisti. Hic ponit quomodo habgeet spem de recuperatione
bonorum quae perdiderat: et sunt duo, scilicet donum prophetiae, et gaudium
conscientiae. Donum prophetiae assimilatur auditui, quia propheta non videt Dei
essentiam, ut in ea videat revelata; sed quaedam signa veritatis revelatae
fiunt in anima prophetae; et haec signa habent se per modum locutionis et etc. I
Reg. 3. "Loquere, Domine, quia audit servus tuus." Isa. 21.
"Quae audivi a Domino exercituum Deo Israel, annuntiavi vobis." Hic auditus erat ei interruptus per
peccatum, et sperat se recuperaturum; et ideo dicit: Auditui meo dabis
gaudium, et laetitiam.
Vel, auditui, quo audivi a Nathan translatum esse
peccatum meum, quo concepi laetitiam.
Sed quantum ad
gaudium conscientiae sciendum est quod spirituale gaudium habet tres gradus.
Primus existit in complacentia affectus; secundus in dilatatione cordis;
tertius in progressu ad exteriora.
Complacentia
designatur per gaudium, cum dicit: Auditui meo dabis gaudium; ex hoc
scilicet quod audiam quae loqueris, vel quae locutus est nathan. Philip.
4. "Gaudete in Domino semper; iterum dico, gaudete." Quando vero
affectus quiescit in re amata, tunc animus eius dilatatur ad plus percipiendum
dilatationem; et hoc etiam apparet in sensibilibus. II Cor. 6. "Cor
nostrum dilatatum est."
Et ideo dicit laetitiam; quae hic importat
dilatationem, quasi latitiam. Sed ulterius quandoque est quod laetitia redundat
usque ad corpus. Prov. 17. "Animus gaudens aetatem floridam facit;
spiritus tristis exsiccat ossa."
Et ideo in visione gloriae in patria post resurrectionem ex
gaudio mentis corpus glorificabitur. Isa. ult. "Videbitis, et gaudebit cor
vestrum, et ossa vestra quasi herbs germinabunt." Et sic dicit ipse: Exultabunt
ossa humiliata; et hoc ad glorificationem praesentem.
Nam per tristitiam poenitentiae cor hominis conteritur; et
ideo quando sunt homines laeti, est signum quod ossa, quae sunt contrita, et
afflicta, participant gaudium. Prov. 12. "Maeror in corde viri humiliabit
eum." Isa. 58. "Implebit splendoribus animal tuam, et ossa tua
liberabit."
Vel exultabunt ossa, ides virtutes spirituales, quae
per laetitiam spiritualem augmentantur, et quia per hanc laetitiam roboratur
iustus.
f. Averte. Hic petit recuperationem
innocentiae: et quia considerat in se malum culpae esse, et bonum gratiae;
petit primo removeri malum, sive peccatum; secundo petit removeri effectum
peccati, ibi, Cor mundum crea in me, Deus. Peccatum enim removetur non
hoc modo quod peccatum non fuerit, sed quod non imputetur ei peccatum commissum
ad poenam, secundum illud Psalm. 31. Beatus vir cui non imputavit Dominus
peccatum. Et loquitur ad similitudinem iudicis punientis, qui primo considerat
quantitatem culpae, et postea taxat poenam; et ideo petit ut non consideret
peccatum eius, sed fit immemor eius; et ideo dicit: Averte faciem tuam a
peccatis meis.
Secundo petit ut non inferatur poena, unde dicit: Et
omnes iniquitates meas dele; quasi dicat: scio quod malum coram te feci; et
ideo rogo ut avertas faciem tuam a peccatis meis, idest non consideres peccata
mea ad puniendum. Ezech. 18. "Omnium iniquitatum eius non
recordabor."
Item merui poenam damnationis; sed rogo ut deleas, quia Deus
etsi non mutat consilium, tamen sententiam mutat: Cor mundum.
Supra Psalmus petiit removeri peccatum; hic autem petit
removeri effectus peccati, qui sunt duo; scilicet inquinatio animae, et
inordinatio affectus. Primus effectus fit per hoc quod homo afficitur ad
terrena: unde petit cordis munditiam. Matth. 5. "Beati mundo corde,
quoniam ipsi Deum videbunt."
Et ideo dicit: Cor
mundum crea in me, Deus, et spiritum rectum. Istam munditiam cordis solus
Deus restituere potest. Iob 14. "quis potest facere mundum de immundo
conceptum semine? Nonne tu qui solus es?" scilicet mundus simpliciter.
Et dicit, Crea.
Creatur aliquid ad esse naturae, quando ex nihilo producitur ad esse.
Gen. 1. "In principio creavit Deus caelum, et terram."
Item quando ad esse gratiae producitur. I Cor. 13. "Si
habuero prophetiam, et noverim mysteria omnia...nihil sum," in esse
gratiae. Sed quando Deus operatur operatione gratiae in habente gratiam,
dicitur magnificare eum; quando vero de peccatore facit iustum, tunc dicitur
proprie creare. Eph. 2. "Ipsius creatura sumus, creati in Christo Iesu in
operibus bonis." Iaco. 1. "Ut sitis initium aliquod creaturae
Dei," scilicet spiritualis eius.
Secundum quod sequitur ex peccato, est inordinatio mentis,
quae fit per aversionem a fine debito. Sicut ergo per conversionem ad aliquod
commutabile bonum animus efficitur immundus, ita per aversione a fine
deordinatur; et huiusmodi deordinationi opponitur rectitudo qua homo dirigitur
in Deum. I Cant. 1. "Recti
diligunt te." Et ideo dicit: Et spiritum rectum innova; idest, de
novo tribuas, quia per peccatum amisi. Ephes. 4. "Renovamini spiritu
mentis vestrae." Et innova non exterius, sed in visceribus meis, ut
scilicet non labia tantum ad loquendum, sed cor fit rectum ad cognoscendum.
Ne proiicias
me a facie tua, et spiritum sanctum tuum ne auferas a me. Hic petit restitutionem gratiae: et primo
petit ipsam gratiam, secundo petit gratiae effectum, ibi, Redde. Gratiam
Dei dicitur quis habere dupliciter. Nam aliquis dicitur habere gratiam Dei, et
hominis, et quantum ad aliquid similiter, scilicet quando est utrique gratus,
scilicet Deo, et homini.
Et haec vocatur
gratia gratum faciens. Ephes. 1. "In qua gratificavit nos in
dilecto filio suo.' Et secundum hoc gratia dicitur benevolentia Dei, qua Deus
diligit hominem ad vitam aeternam. Et quantum ad aliquid est dissimile. Gratia
enim hominis non facit eum bonum, sed ex sua bonitate efficitur gratus homini;
sed apud Deum est e converso: quia ex Dei benevolentia sequitur quod homo fiat
bonus. Duo ergo sunt in gratia Dei; scilicet ipsa benevolentia, et effectus
eius in anima; et utrumque petit cum dicit: Ne proiicias me a facie tua; et
spiritum sanctum tuum ne auferas a me.
Et hoc potest
dupliciter intelligi. Ille qui est in facie alicuius, videtur ab eo, et potest
illum videre. Iste dicitur esse in facie Dei secundum illud III Reg. 17.
"Vivit Dominus, in cuius
conspectu sto." Genes. 32. "Deus, in cuius conspectu ambulaverunt
patres nostri." Et hoc quia ipsi recti sunt ad videndum Deum. Psalm. 26. Unam
petii a Domino, hanc requiram, ut inhabitem in domo Domini omnibus diebus vitae
meae.
Per peccatum
utrumque perditur; quia peccatores deserunt Deum, deseruntur a Deo, et amittunt
fiduciam confidendi de Deo. Esa. 59. "Peccata, et iniquitates diviserunt
inter vos et Deum vestrum (quantum ad primum) et peccata vestra absconderunt
faciem eius a vobis;" quantum ad secundum. Iste est ergo a facie Dei per
peccatum proiectus; et ideo petit ne finaliter proiiciatur utroque modo.
Item nota, quod
in homine duo sunt; scilicet culpa, ex qua dignus est poena, et natura, ex qua
habet congruitatem ad gratiam: et ideo petit ut non prospiciat culpam, sed
naturam, et ideo dicit, Ne proiicias me.
Item donum
gratiae datur per caritatem, et tale donum datur per Spiritum sanctum; et ideo
dicit: Et spiritum sanctum tuum ne auferas a me; cuius templum fueram,
sed perdidi propter peccatum. Sap. 1. "Spiritus sanctus disciplinae
effugiet fictum." Ne ergo auferas, scilicet finaliter.
Redde mihi. Nam duo facit gratia in homine. Unum
respectu superiorum: quia scilicet dat iucunditatem, quia qui habet gratiam,
habet caritatem; et qui habet caritatem, amat Deum, et habet ipsum; et qui
habet quod amat, gaudet. Ergo ubi caritas ibi gaudium. Rom. 14. "Non est
Regnum Dei esca, et potus, sed gaudium in Spiritu sancto." Hoc gaudium
perdiderat Psalmista; et ideo petit restitui sibi, cum dicit: Redde mihi
laetitiam, non de mundanis, sed salutaris tui, idest de tua
salvatione.
Alia litera habet, Laetitiam Iesu, scilicet
salvatoris, per quem fit remissio peccatorum. Habac. ult. "Exultabo in Deo
Iesu meo."
Alius effectus
est respectu inferiorum; et hic effectus est confirmatio in gratia, quae fit
per Spiritum sanctum: Et spiritu principali confirma me.
Spiritus autem
sanctus firmat dupliciter. Uno modo contra mala: Esa. 8. "In forti
manu erudivi te:" alio modo in bono. Esa. 40. "Qui sperant in Domino
mutabunt fortitudinem." Haec fortitudo habetur per Spiritum. Nam corpus non est firmum, nec ad
faciendum nisi propter fortidinem spirituum: ita homo non est fortis sine
Spiritu sancto. Sed ille non praeberet fortitudinem nisi esset spiritus
principalis, quia virtus inferior non est sufficiens ad praebendum auxilium
contra superiorem. Potestas autem diaboli est magna. Iob. 41. "Non est
potestas super terram quae comparetur ei." Ergo contra diabolum indiget
homo iuvari spiritu principali, scilicet principante et dominante super omnia.
Et hoc spiritu indidet homo contra spiritum carnis. Num. 16. Fortissime
Deus spirituum universae carnis."
Item contra spiritum mundi. I Cor. 2. "Nos autem non spiritum huius mundi
accepimus, sed spiritum qui est ex Deo." Item conspiritum diaboli. I. Reg.
18. "Invasit spiritus Domini malus Saul." Notandum est, quod in hac
lectione fit triplex mentio de spiritu: quia dicitur spiritus rectus, spiritus
sanctus, et spiritus principalis. Et secundum Glos. quidam accipiunt spiritum
essentialiter dictum, secundum quod est spiritus omne quod non est corpus. Unde
spiritus dicitur Pater, et Filius, et Spiritus sanctus; sed melius est ut
accipiatur personaliter. Tria autem facit Spiritus sanctus in homine.
Primo
rectitudinem intentionis. Psal. 142. Spiritus bonus deducet me in terram
rectam. Item sanctificat nos. Rom. 1. "Secundum spiritum sanctificationis." Item nobilitat, et tacit nos principes. Gal.
4. "Quoniam estis filii Dei, misit Deus spiritum filii sui in corda
vestra."
(g) Docebo. Supra Psalmista proposuit suas petitiones
Deo; hic autem repromittit recompensationem: et primo promittit quid fit
facturus pro Deo in praesenti; secundo in futuro, ibi, Benigne. Circa
primum duo facit. Primo promittit Deo quaedam spiritualia sacrificia; secundo
excusat se ab oblatione carnalium, ibi, Quoniam si voluisses. Duplex
sacrificium spirituale Deo promittit; scilicet doctrinae per quod instruatur
proximus; secundo promittit spirituale sacrificium laudis, per quod laudetur
Deus, ibi, Libera me.
Dicit ergo: Docebo iniquos vias tuas. Et notandum,
quod supra in alio Psalmo dixit (49) Peccatori dixit Deus: Quare tu enarras
iustitias meas, et assumis nomen meum per os tuum? Per quod ostendit quod
peccatorem non decet doctrinam effundere.
Et ideo quamdiu sensit se peccatorem, non promisit doctrinam
manifestare; sed postquam restituit ei Deus spiritum principalem: et tales
decet doctrinam habere, et alios docere. Hier. 3. "Dabo vobis pastorem iuxta cor meum, qui pascet vos scientia,
et doctrina."
Et de Christo
dicitur Acto. 1. 'Coepit Iesus facere, & (postea) docere." Fructus autem huius doctrinae non est
tantum speculatio veritatis ad beatam contemplationem, sed intentus finis eius
est conversio peccatorum: et ideo dicit: Et impii ad te convertentur.
Hierem. 15 "Ipsi convertentur ad te, et tu non converteris ad eos."
Psalm. 21. Convertentur ad Dominum omnes gentes. Et secundum Glo. eosdem
dicit impios, et iniquos, quamvis David intelligat quod iniqui dicuntur qui
peccant contra Deum; et ideo signanter dicit, Docebo iniquos, quasi
dicat: Aliqui etsi revereantur Deum, tamen operantur contra proximum, et
iniusta; et hos docebo vias tuas, scilicet ut non offendant proximum. Pr. Ioan.
4. "Mandatum habemus a Deo ut qui diligit Deum, diligat et fratrem
suum."
Libera me de
sanguinibus. Hic
promittit sacrificium laudis; et sunt duo impedimenta huius sacrificii. Unum
est reatus peccati; aliud est interior defectus. Primo ergo petit
remotionem primi impedimenti; secundo petit remotionem secundi, ibi, Domine,
labia mea aperies. Petit ergo remotionem impedimenti, et promittit
sacrificium laudis. Impedimentum laudis divinae, sicut dictum est, est reatus culpae.
Eccl. 15. "Non est speciosa laus in ore peccatoris."
David autem erat gravi culpa reus; et ideo petit liberari ab
ea et ideo dicit: Libera me de sanguinibus. Secundum Glo. hoc nomen
sanguis non declinatur in plurali numero; tamen translator voluit uti ad
expressionem peccati; et refertur hoc ad concupiscentiam carnis quae est caro
et sanguis. Matt. 16. "Caro et
sanguis non revelavit tibi; sed Pater meus qui est in caelis." Quasi
dicat: Libera me de peccatis commissis de carne et sanguine.
Vel dicendum,
quod David commiserat culpam adulterii, et homicidii; et in utroque est
sanguis: quia in homicidio sanguis effunditur. Ps. 5. Virum sanguinum, et
dolosum abominabitur Dominus. Adulterium autem procedit ex fervore
sanguinis; et ideo dicit. De sanguinibus. Oseae 4. "Sanguis
sanguinem tetigit." O Deus, libera ergo me de sanguinibus, quia solus
potes. Isa. 43. "Ego sum qui deleo iniquitates tuas propter me, et
peccatorum tuorum non recordabor:" et quia tu es Deus salutis mei,
idest qui potes me salvare. Et exultabit lingua mea; idest, cum
delectatione, et cum interiori gaudio cordis, narrabo iustitiam tuam. Isa. 30.
"Canticum erit vobis, sicut vox sanctificatae solemnitatis." Item ibidem (cap. 35.) "Venient
in Sion laudantes, et laetitia sempiterna super capita eorum." Psalm. 41. "In voce exultationis, et
confessionis sonus epulantis."
Domine, labia mea aperies. Est autem sciendum, quod
homo aliquando impeditur a doctrina etiam propter impedimentum interius
loquendi; et hoc contingit aliquando propter culpam auditorum. Ezech. 3.
"Linguam tuam adhaerere faciam palato tuo; et eris mutus. Et infra.
"Quia domus exasperans est." Et propter proprium peccatum. Psalm. 106. Omnis iniauitas oppilabit os
suum. Quia ergo solus Deus "linguas infantium fecit disertas:"
Sapien. 10. ideo petit: Domine, remove impedimenta quae incurri per peccatum, a
labiis meis; et tu Labia mea aperies. Ephe. ult. "Ut detur
mihi sermo in apertione oris mei, cum fiducia notum facere mysterium
Evangelii."
Est autem notandum, quod in apertione oris intelligitur
doctrinae profunditas, ubicumque in Scripturis invenitur apertio oris; ut Iob
3. "Post haec aperuit Iob os suum." Et Matth. 5. "Aperiens Iesus
os suum," scilicet in profunditatem Scripturae. Et tunc os meum
annuntiabit laudem tuam; quasi dicat: Quod in corde habeo, ore confitebor.
(h) Quoniam si voluisses sacrificium. Hic excusat se:
et primo ostendit sacrificium non esse Deo acceptum; secundo ostendit quod
sacrificium sit Deo acceptum, ibi, Sacrificium Deo.
Dicit ergo: Ego repromitto doctrinam, et laudem: hoc enim
sacrificium honorificabit te, sed carnale sacrificium non est tibi acceptum. Et
ideo dicit: Si voluisses sacrificium, scilicet carnale, utique
dedissem; sed utique holocaustis non delectaberis.
Sed numquid non vult sacrificia carnalia? Si illa sacrificia
non approbat Deus, quare ergo mandavit fieri in veteri lege?
Dicendum, quod mandavit ea fieri non propter se, sed quia
erant figura interioris veri sacrificii quo Christus se obtulit; et sunt signa
interioris sacrificii, inquantum homo animam suam offert Deo, et iterum fuerunt
instituta propter rudes, qui Deum non noverant; et ideo oportebat quod in rebus
honorarent, et cognoscerent Deum, ne sacrificia idolis imolarent, ad quod erant
multum proni. Sed quia David ex Spiritu sancto sciebat cordis sacrificium Deo
acceptum, non dedit hic sacrificia corporalia.
Inter omnia autem sacrificia, holocausta erant magis Deo
accepta. Et tamen illa propter se
non erant accepta Deo; ideo dicit: Holocaustis non delectaberis: quia et
si ipsa fuissent tibi accepta simpliciter, obtulissem ea. Et si obiiciatur quod
odor suavissimus erant Domino; dicendum, quod erat hoc propter figuratum
sacrificium, et in signum interioris sacrificii, quod Deo placet. Unde subdit: Sacrificium
Deo, scilicet acceptum, spiritus contribulatus. Aug. 10. de Civi.
Dei: "Omne sacrificium, quod offert exterius, signum est interioris
sacrificii, in quo animam suam offert Deo."
Sed sciendum,
quod anima hominis deducitur in peccatum primo per inane gaudium. Eccle.
2. "Risum reputavi errorem, et gaudio dixi: Quid frustra deciperis?"
idest deduceris in peccatum. Secundo induratur ad spiritualia ex peccato.
Eccli. 3. "Cor durum male habebit in novissimo." Rom. 2.
"Secundum duritiam tuam, et cor impoenitens." Tertio quia sufficit
sibi in rebus corporalibus, et non curat de spiritualibus, tunc superbit; quod
"est initium omnis peccati:" Eccli. 10. Oportet ergo quod poenitens
qui cor suum offert sacrificium Deo, contraria omnibus his faciat.
Et primo contra inane gaudium oportet quod assumat
tristitiam poenitentiae; et ideo subdit: Sacrificium Deo spiritus
contribulatus; idest, de omnibus peccatis simul tristatur, non de uno
tantum. II Cor. 7. "Quae secundum Deum est tristitia, poenitentiam in
salutem stabilem operatur." Baruch.2. "Anima quae est tristis super
magnitudinem mali, et incidit curva: et infra dat tibi gloriam, et tristitiam
Domino."
Contra secundum opponitur contritio: unde dicit, Cor
contritum. Et nota differentiam inter confracta et contrita: quia confracta
sunt quae dividuntur in magnas partes; contrita sunt quae in parvissimas partes
dividuntur. Quamdiu ergo quis habet cor durum, tunc quasi integrum habet cor in
malitia; sed quando totaliter deserit peccatum praebens se spiritualibus,
dicitur tunc contritus. Iob 16. "Ego ille quondam opulentus (scilicet in
temporalibus) repente contritus sum."
Contra tertium opponitur humilitas; et ideo dicit: Et
humiliatum, Deus, non despicies: quia "superbis Deus resistit;
humilibus autem dat gratiam:" Iac.4. Et est sciendum, quod facit mentionem de corde, et spiritu: et spiritus
pertinet ad animositatem, et sic pertinet ad irascibilem. Isa. 25.
"Spiritus robustorum quasi turbo impellens parietem." Cor pertinet ad
concupiscibilem; et sic datur per hoc intelligi quod quicquid est in vi
appetitiva, debet Deo offerri in sacrificium.
(i) Benigne. Hic promittit quid debeat facere in
futurum: et primo petit quid fiendum a Deo; secundo pronuntiat, ibi, Tunc
accentabis.
Oculus
David ferebatur ad duo. Unum propinquum, quod erat figurale, aliud remotum,
quod erat figuratum. Primum, quia legitur, quod David aedificavit muros
civitatis Hierusalem, sed non consummaverat; et his consummatis aedificandum
erat templum, et ideo dicit: Fac in bona voluntate tua ut aedificentur muri
Hierusalem. Et tunc
aedificatis muris, aedificabitur templum, et tunc acceptabis sacrificium
iustitiae, oblationes, et holocausta. Et hoc totum erat figurale.
Sed si referamus
ad figuratum, sic dicendum est, quod est duplex Hierusalem; scilicet caelestis.
Gal. 4. "Illa quae sursum est Hierusalem, libera est, quae est mater
nostra." Alia est praesens Ecclesia exemplata ab illa. Apoc. 21.
"Vidi civitatem sanctam Hierusalem novam, descendentem de caelo a
Deo."
Et utraque habet
muros. Muri caelestis Hierusalem sunt munimenta aeternitatis, et
immortalitatis, quam consecuti sunt sancti per Christum. Rom. 8. "Qui
suscitavit Iesum Christum, vivificabit et mortalia corpora nostra." Muri
praesentis Hierusalem, scilicet Ezech. 13. "Non stetistis ex adverso, ne
opposuistis murum pro domo Israel, ut staretis in praelio." Aedificationem
istorum praevidebat spiritu prophetiae Isaias 56. Ad hoc ergo quod aedificentur
isti muri, tu, Domine, fac benigne, idest, ostende benignitatem hanc:
quam benignitatem Apostolus Tit. 3. dicit impletam. "Apparuit benignitas,
et humanitas salvatoris nostri Dei."
Et hoc non propter merita nostra, sed propter tuam
voluntatem bonam. Rom. 12. "Ut probetis quae fit voluntas Dei bona, et
beneplacens, et perfecta." I Thes. 4. "Haec est voluntas Dei
sanctificatio vestra." Et hoc facias ad hoc ut aedificentur muri
Hierusalem, vel militantis, vel triumphantis.
Sed quid
erit? Tunc acceptabis sacrificium iustitiae Hoc autem tripliciter
exponitur: et duo primi modi pertinent ad Ecclesiam praesentem. Uno modo quod
hoc referamus ad sacrificium, non quo trucidantur pecora, sed quo occiduntur
homines propter Christum, et in hoc est duplex gradus: quia primum locum tenet
sacrificium Christi. Galat. 2.
"Dilexit me, et tradidit semetipsum pro me." Et ideo dicit, Tunc,
idest in aedificatione murorum Hierusalem, idest Ecclesiae, acceptabis
sacrificium iustitiae, quo Christus se obtulit, qui iustus est. Ioan. 8.
"Quis ex vobis arguet me de peccato?"
Et quia tantae
virtutis est ut satisfaceret pro homine, ut iustificaret eum. Secundum locum
tenent alii sancti qui se propter Deum obtulerunt in sacrificium: unde dicit, Oblationes,
scilicet confessores, qui confitendo Christum, quantum in se est, obtulerunt se
morti, licet non sint occisi. Iudic. 5. "Qui sponte obtulistis de
Israel animas vestras ad periculum, benedicite Domino."
Et holocausta.
Isti sunt martyres. Ioan.
15. "Maiorem caritatem nemo habet, ut animam suam ponat quis pro amicis
suis." Et tunc accentabis, quando ita ipso sancti imponent se
tanquam vitulos super altare tuum; idest, super fidem tuam, et super Christum,
idest, exponent se tamquam vitulos, propter Christum, et fidem Christi ad
immolandum.
Alio modo ut
referatur quantum ad opera iustorum: et sic est sensus: Acceptabis iustitiam,
sicut sacrificium, quia opera iustitiae, et misericordiae sunt sicut
sacrificium. Heb. ultimo. "Beneficentiae, et communionis nolite oblivisci:
talibus enim hostiis promeretur Deus." Et tunc accipies oblationes.
Secundum Gregorium, holocaustum est quod totum incendebatur; et signat
perfectos viros, qui totaliter dant se Deo.
Oblationes sunt
illi qui aliquid offerunt, et aliquid reservant: et tunc sacerdotes imponent
vitulos, idest, conversos de novo, super altare, idest super fidem
Christi: vel tunc praelati maiores imponent praedicatores mugientes doctrina
fidei super altare, idest super confessione fidei.
Tertia expositio
est de caelesti Hierusalem; et est sensus: Tunc, scilicet quando aedificabuntur
muri caelestis Hierusalem, acceptabis sacrificium iustitiae. Hic
quandoque fit sacrificium poenitentiae; sed ibi est tantum laudis. Isa.60.
"Populus tuus omnes iusti in perpetuum hereditabunt terram." Et hoc
est illud sacrificium laudis de quo Psal. 63. Beati qui habitant in
domo tua, in saecula saeculorum laudabunt te. Et tunc oblationes, idest sanctos minores, et
holocausta, idest sanctos maiores acceptabis. Et hoc offerent Angeli,
quibus dicitur, Matth. 13. "Triticum autem congregate in horreum
meum." Et isti Angeli imponent sanctos super altare tuum,
idest in gloriam caelestem. Apoc. 8. "Data sunt ei incensa multa,
ut darent de orationibus sanctorum omnium super altare aureum." Ps. 68. Placabit
Deo super vitulum novellum cornua producentem, et ungulas.
|