|
55.
De oliveto oleam, quam manu tangere possis e terra ac scalis, legere oportet
potius quam quatere, quod ea quae vapulavit macescit nec dat tantum olei. Quae
manu stricta, melior ea quae digitis nudis, quam illa quae cum digitabulis,
durities enim eorum quod non solum stringit bacam, sed etiam ramos glubit ac
relinquit ad gelicidium retectos. Quae manu tangi non poterunt, ita quati
debent, ut harundine potius quam pertica feriantur; gravior enim plaga medicum
quaerit. Qui quatiet, ne adversam caedat; saepe enim ita percussa olea secum
defert de ramulo plantam, quo facto fructum amittunt posteri anni. Nec haec non
minima causa, quod oliveta dicant alternis annis non ferre fructus aut non
aeque magnos. Olea ut uva per idem bivium redit in villam, alia ad cibum, alia
ut eliquescat ac non solum corpus intus unguat sed etiam extrinsecus. Itaque dominum et balneas
et gymnasium sequitur. Haec, de qua fit oleum, congeri solet acervatim in dies
singulos in tabulata, ut ibi mediocriter fracescat ac primus quisque acervos
demittatur per serias ac vasa olearia ad trapetas, quae res molae oleariae ex
duro et aspero lapide. Olea lecta si nimium diu fuit in acervis, caldore
fracescit et oleum foetidum fit. Itaque si nequeas mature conficere, in acervis
iactando ventilare oportet. Ex olea fructus duplex: oleum, quod omnibus notum,
et amurca, cuius utilitatem quod ignorant plerique, licet videre e torculis
oleariis fluere in agros ac non solum denigrare terram, sed multitudine facere
sterilem; cum is umor modicus cum ad multas res tum ad agri culturam pertineat
vehementer, quod circum arborum radices infundi solet, maxime ad oleam, et
ubicumque in agro herba nocet.
56.
Agrius, Iamdudum, inquit, in villa sedens expecto cum clavi te, Stolo, dum
fructus in villam referas. Ille, Em quin adsum, venio, inquit, ad limen, fores
aperi. Primum faenisiciae conduntur melius sub tecto quam in acervis, quod ita
fit iucundius pabulum. Ex eo intellegitur, quod pecus utroque posito libentius
est.
57.
Triticum condi oportet in granaria sublimia, quae perflentur vento ab exortu ac
septemtrionum regione, ad quae nulla aura umida ex propinquis locis adspiret. Parietes et solum opere tectorio marmorato loricandi;
si minus, ex argilla mixta acere e frumento et amurca, quod murem et vermem non
patitur esse et grana facit solidiora ac firmiora. Quidam ipsum triticum
conspargunt, cum addant in circiter mille modium quadrantal amurcae. Item alius
aliut adfriat aut aspargit, ut Chalcidicam aut Caricam cretam aut absenthium,
item huius generis alia. Quidam granaria habent sub terris speluncas, quas
vocant sirus, ut in Cappadocia ac Thracia; alii, ut in agro Carthaginiensi et
Oscensi in Hispania citeriore, puteos. Horum solum paleis substernunt et curant
ne umor aut aer tangere possit, nisi cum promitur ad usum; quo enim spiritus non
pervenit, ibi non oritur curculio. Sic conditum triticum manet vel annos L,
milium vero plus annos C. Supra terram granaria in agro quidam sublimia
faciunt, ut in Hispania citeriore et in Apulia quidam, quae non solum a
lateribus per fenestras, sed etiam subtus a solo ventus refrigerare possit.
Faba et legumina in oleariis vasis oblita cinere perdiu incolumia servantur.
|