XII. Aesopus et victor gymnicus

Quomodo comprimatur aliquando iactantia

Victorem forte gymnici certaminis
iactantiorem Phryx cum vidisset sophus,
interrogavit an plus adversarius
valuisset nervis. Ille: "Ne istud dixeris;
multo fuere vires maiores meae."
"Quod" inquit "ergo, stulte, meruisti decus,
minus valentem se vicisti fortior?
Ferendus esses, arte si te diceres
superasse eum qui te esset melior viribus."