VI. Musca et Mula

Musca in temone sedit et mulam increpans
"Quam tarde es" inquit "non vis citius progredi?
Vide ne dolone collum conpungam tibi."
Respondit illa: "Verbis non moveor tuis;
sed istum timeo sella qui prima sedens
cursum flagello temperat lento meum,
et ora frenis continet spumantibus.
quapropter aufer frivolam insolentiam;
nam et ubi tricandum et ubi sit currendum scio."
Hoc derideri fabula merito potest
qui sine virtute vanas exercet minas.