XXX. Papilio et vespa

Non praeteritam sed praesentem aspiciendam esse fortunam

Papilio vespam prope volantem viderat:
"O sortem iniquam! Dum vivebant corpora,
quorum ex reliquiis animam nos accepimus,
ego eloquens in pace, fortis proeliis,
arte omni princeps inter aequalis fui;
en cuncta levitas putris et volito cinis.
Tu, qui fuisti mulus clitellarius,
quemcumque visum est laedis infixo aculeo."
At vespa dignam memoria vocem edidit:
"Non qui fuerimus, sed qui nunc simus, vide."