Sulpiciae Elegidia

XIII

Tandem uenit amor, qualem texisse pudori
    quam nudasse alicui sit mihi fama magis.
Exorata meis illum Cytherea Camenis
    attulit in nostrum deposuitque sinum.
Exsoluit promissa Venus: mea gaudia narret,               5
    dicetur si quis non habuisse sua.
Non ego signatis quicquam mandare tabellis,
    ne legat id nemo quam meus ante, uelim,
sed peccasse iuuat, uultus componere famae
    taedet: cum digno digna fuisse ferar.               10