Epigr. CLXVII-CLXXVI

CLXVII. Plectrum

Fervida ne trito tibi pollice pusula surgat,
Exornent docilem candida plectra lyram.

CLXVIII. Trochus

Inducenda rota est: das nobis utile munus:
Iste trochus pueris, at mihi cantus erit.

CLXIX. Idem

Garrulus in laxo cur anulus orbe vagatur?
Cedat ut argutis obvia turba trochis.

CLXX. Signum Victoriae aureum

Haec illi sine sorte datur, cui nomina Rhenus
Vera dedit. Deciens adde Falerna, puer.

CLXXI. Broutou paidion fictile

Gloria tam parvi non est obscura sigilli:
Istius pueri Brutus amator erat.

CLXXII. Sauroctonos Corinthius

Ad te reptanti, puer insidiose, lacertae
Parce: cupit digitis illa perire tuis.

CLXXIII. Hyacinthus in tabula pictus

Flectit ab inviso morientia lumina disco
Oebalius, Phoebi culpa dolorque, puer.

CLXXIV. Hermaphroditus marmoreus

Masculus intravit fontis, emersit utrumque:
Pars est una patris, cetera matris habet.

CLXXV. Danae picta

Cur a te pretium Danae, regnator Olympi,
Accepit, gratis si tibi Leda dedit?

CLXXVI. Persona Germana

Sum figuli lusus russi persona Batavi.
Quae tu derides, haec timet ora puer.