Clytaemnestra-Electra-Aegisthus-Cassandra

Clyt. Hostis parentis, impium atque audax caput,
quo more coetus publicos virgo petis?

Elec. Adulterorum virgo deserui domum.

Clyt. Quis esse credat virginem

Elec. Gnatam tuam?

Clyt. Modestius cum matre.

Elec. Pietatem doces?

Clyt. Animos viriles corde tumefacto geris;
sed agere domita feminam disces malo.

Elec. Nisi forte fallor, feminas ferrum decet.

Clyt. Et esse demens te parem nobis putas?

Elec. Vobis? quis iste est alter Agamemnon tuus?
ut vidua loquere: vir caret vita tuus.

Clyt. Indomita posthac virginis verba impiae
regina frangam; citius interea mihi
edissere ubi sit gnatus, ubi frater tuus.

Elec. Extra Mycenas.

Clyt. Redde nunc gnatum mihi.

Elec. Et tu parentem redde.

Clyt. Quo latitat loco?

Elec. Tuto quietus, regna non metuens nova:
iustae parenti satis.

Clyt. At iratae parum.
morieris hodie.

Elec. Dummodo hac moriar manu.
recedo ab aris. sive te iugulo iuvat
mersisse ferrum, praebeo iugulum tibi;
seu more pecudum colla resecari placet,
intenta cervix vulnus expectat tuum.
scelus paratum est: caede respersam viri
atque obsoletam sanguine hoc dextram ablue.

Clyt. Consors pericli pariter ac regni mei,
Aegisthe, gradere. gnata genetricem impie
probris lacessit, occulit fratrem abditum.

Aeg. Furibunda virgo, vocis infandae sonum
et aure verba indigna materna opprime.

Elec. Etiam monebit sceleris infandi artifex,
per scelera natus, nomen ambiguum suis,
idem sororis gnatus et patris nepos?

Clyt. Aegisthe, cessas impium ferro caput
demetere? fratrem reddat aut animam statim.

Aeg. Abstrusa caeco carcere et saxo exigat
aevum; per omnes torta poenarum modos
referre quem nunc occulit forsan volet.
inops egens inclusa, paedore obruta,
vidua ante thalamos, exul, invisa omnibus
aethere negato sero subcumbet malis.

Elec. Concede mortem.

Aeg. Si recusares, darem.
Rudis est tyrannus morte qui poenam exigit.

Elec. Mortem aliquid ultra est?

Aeg. Vita, si cupias mori.
Abripite, famuli, monstrum et avectam procul
ultra Mycenas ultimo in regni angulo
vincite saeptam nocte tenebrosi specus,
ut inquietam virginem carcer domet.

Clyt. At ista poenas capite persolvet suo
captiva coniunx, regii paelex tori.
trahite, ut sequatur coniugem ereptum mihi.

Cass. Ne trahite, vestros ipsa praecedam gradus.
perferre prima nuntium Phrygibus meis
propero: repletum ratibus eversis mare,
captas Mycenas, mille ductorem ducum,
ut paria fata Troicis lueret malis,
perisse dono, feminae stupro, dolo.
nihil moramur, rapite, quin grates ago:
iam, iam iuvat vixisse post Troiam, iuvat.

Clyt. Furiosa, morere.

Cass. Veniet et vobis furor.