Caput 5

Sevius Nicanor primus ad famam dignationemque docendo pervenit, fecitque praeter commentarios, quorum tamen pars maxima intercepta dicitur, satyram quoque, in qua libertinum se ac duplici cognomine esse per haec indicat:

Sevius Nicanor Marci libertus negabit:
Sevius post huius * idem ac Marcus docebit.

Sunt qui tradant, ob infamiam quandam eum in Sardiniam secessisse ibique diem obisse.