|
39. Atilius Calatinus, dux adversum Carthaginienses missus,
ex maximis et munitissimis civitatibus Enna Drepano Lilybaeo hostilia praesidia
deiecit. Panormum cepit. Totamque Siciliam pervagatus patris navibus magnam
hostiam classem duce Hamilcare superavit. Sed cum ad Catinam ab hostibus
obsessam festinaret, a Poenis in angustiis clausus est, ubi tribunus militum
Calpurnius Flamma acceptis trecentis sociis in superiorem locum evasit,
consulem liberavit; ipse cum trecentis pugnans cecidit. Postea ab Atilio semianimis inventus et sanatus magno
postea terrori hostibus fuit. Atilius gloriose triumphavit.
40. Marcus Atilius Regulus consul fusis Sallentinis
triumphavit primusque Romanorum ducum in Africam classem traiecit. Ea quassata de Hamilcare
naves longas tres et sexaginta cepit. Oppida
ducenta et hominum ducenta milia cepit. Absente eo coniugi eius et liberis ob paupertatem
sumptus publice dati. Mox arte Xanthippi Lacedaemonii mercenarii militis captus
in carcerem missus. Legatus de permutandis captivis Romam missus dato
iureiurando, ut, si impetrasset, ita demum non rediret, in senatu condicionem
dissuasit reiectisque ab amplexu coniuge et liberis Carthaginem regressus, ubi
in arcam ligneam coniectus clavis introrsum adactis vigiliis ac dolore punitus
est.
|