XLIV. De quadrupedibus et avibus

Quadrupedes pugnant avibus, victoria nutat.
Spes honerata metu vexat utrumque gregem.
Linquit aves que sumit avis de vespere nomen
Nec timet oppositi castra iuvare chori.
Armat aves aquile virtus et viribus inplet
Et monitu. torpet altera turba metu.
Amplexatur aves ulnis victoria letis,
Pro titulo penam transfuga sumat avis.
Vellere nuda suo pro plumis vellera vestit,
Edictumque subit, ne nisi nocte volet.
Non bonus est civis, qui prefert civibus hostem.
Utiliter servit nemo duobus heris.