L. De patre et filio

Est pater, huic natus. hic patri cedere nescit,
Nam fugienda facit et facienda fugit.
Mens vaga discurrit et menti consonat etas:
Mentis et etatis turbine frena fugit.
Ira senis punit pro nati crimine servos,
Instruit ista senem fabula nota seni.
Cauta bovem vitulumque manus supponit aratro.
Hic subit, ille iugum pellit. arator ait:
Gaude, letus ara, tu quem domat usus arandi.
A bove maiore discat arare minor.
Non placet, ut sudes, sed des exempla minori,
Qui pede, qui cornu pugnat abire iugo.
Sic domat indomitum domitoque bove cautus arator,
Sic veterem sequitur iunior ille bovem.
Proficit exempli merito cautela docendi,
Maiorique sua credat in arte minor.