LII. De lupis et ovibus

Pugna lupis opponit oves, oviumque satelles
Est canis, est vervex. hac ope fidit ovis.
Palma diu dormit, desperat turba luporum,
Et simulans fedus federe temptat ovem.
Fedus utrumque fides iurato numine fulsit,
Id lupus, id simplex obside firmat ovis,
Datque lupis male sana canes, recipitque luporum
Pignora. nec metuit nec sua dampna videt.
Dum natura iubet natos ululare lupinos,
Turba lupina furit, federa rupta querens.
Ergo pecus tutoris egens in viscera mergit.
Preside nuda suo sic tumulatur ovis.
Tutorem retinere suum tutissima res est.
Nam si tutor abest, hostis obesse potest.