XXIV. De lupo et sue

Vult lupus ut pariat maturum sucula fetum,
Seque novi curam spondet habere gregis.
Sus ait: Hac cura careas, michi nolo ministres.
Horrent obsequium viscera nostra tuum.
I procul ut tutos liceat michi fundere fetus.
I procul et pietas hec erit apta michi.
Pro natis natura iubet timuisse parentem.
Fine dato verbis hic abit, illa parit.
Tempore non omni non omnibus omnia credas.
Qui misere credit, creditur esse miser.