Praefatio. Incipit Esopus

Ut iuvet et prosit, conatur pagina presens:
Dulcius arrident seria picta iocis.
Ortulus iste parit fructum cum flore, favorem
Flos et fructus emunt: hic sapit, ille nitet.
Si fructus plus flore placet, fructum lege. si flos
Plus fructu, florem. si duo, carpe duo.
Ne mihi torpentem sopiret inhercia sensum,
In quo pervigilet, mens mea movit opus.
Ut messis precium de vili surgat agello,
Verbula sicca, deus, implue rore tuo.
Verborum levitas morum fert pondus honestum,
Et nucleum celat arida testa bonum.