XXXVIII. De lupo et vulpe

Respondere lupo de furti labe tenetur
Vulpes. causa vocat. hic petit, illa negat.
Simius est iudex. docti non errat acumen
Iudicis, archanum mentis in ore legit.
Iudicium figit: Poscis, quod poscere fraus est,
Visque fidem de re, quam negat ipsa fides.
Tu bene furta negas, te vite purior usus
Liberat. Hanc litem pax domat. ira cadit.
Simplicitas veri fraus estque puerpara falsi.
Esse solent vite consona verba sue.
Sordibus inbuti nequeunt dimittere sordes.
Fallere qui didicit, fallere semper amat.