LVI. De simia et vulpe

Simia de turpi queritur nate. porrigit aures
Vulpes, non recipit mente, sed aure preces.
Simia sic fatur: Natis ut michi dedecus ornem,
Sufficeret caude pars michi parva tue.
Quid prodest nimia campos insculpere cauda?
Quod michi prodesset, est tibi pondus inhers.
Illa refert: Nimio dampnas de pondere caudam.
Est brevis estque levis. hec duo dampna queror.
Malo verrat humum, quam sit tibi causa decoris,
Quam tegat inmundas res bene munda nates.
Id nimium nimioque minus ditaret egenum,
Quod nimium minimo credis, avare, minus.