IV. De cane et ove

In causam canis urget ovem. sedet arbiter, audit.
Reddat ovis panem vult canis, illa negat.
Pro cane stat milvus, stat vultur, stat lupus. instant,
Panem quem pepegit reddere, reddat ovis.
Reddere non debet, nec habet quid reddere possit.
Et tamen ut reddat, arbiter instat ovi.
Ergo suum, licet instet hiemps, pervendit amictum,
Et boream patitur vellere nuda suo.
Sepe fidem falso mendicat inharcia teste,
Sepe dolet pietas criminis arte capi.