X. De rustico et colubro

Dum nive candet humus, glacies dum sopit aquarum
Cursus, in colubrum turbida sevit hiemps.
Hunc videt, hunc reficit hominis clemencia. ventum
Temperat huic tecto, temperat igne gelu.
Ore serit virus coluber, sic toxicat edem.
Hospes ait colubro: Non rediturus abi.
Non exit coluber nec vult exire, sed heret
Amplectensque virum sibila dira movet.
Reddere gaudet homo nequam pro melle venenum,
Pro fructu penam, pro pietate dolum.