XVII. De asino et catulo et domino

Murmuris et caude studio testatus amorem
Nunc lingua catulus, nunc pede palpat herum.
Gaudet herus comitque canem comitemque ciborum
Efficit. alludit turba ministra cani.
Arte pari similesque cibos similemque favorem
Lucrari cupiens inquit asellus inhers:
Me catulo prefert vite nitor, utile tergum,
Nec placeo fructu, sed placet ille ioco.
Ludam. lude places. sic ludit tempore viso,
Ut ludo placeat, ludit et instat hero.
Blandiri putat ore tonans, humerisque priorum
Pressis mole pedum se putat esse pium.
Clamat herus. vult clamor opem. subit ordo clientum.
Multa domat multo verbere clava reum.
Quod natura negat, nemo feliciter audet.
Displicet inprudens, unde placere putat.