|
25. Tetricus iunior puerulus a
Victoria Caesar est appellatus, cum illa mater castrorum ab exercitu nuncupata
esset. Qui et ipse cum patre per triumphum ductus postea omnibus senatoriis
honoribus functus est inlibato patrimonio, quod quidem ad suos posteros misit,
ut Arellius Fuscus dicit, semper insignis. Narrabat avus meus hunc sibi
familairem fuisse neque quemquam [quam] illi ab Aureliano aut postea ab aliis
principibus esse praelatum. Tetricorum domus hodieque extat in monte Caelio
inter duos lucos contra Isium Metellinum pulcherrrima, in qua Aurelianus pictus
est utrique praetextam tribuens et senatoriam dignitatem, accipiens ab his
sceptrum, coronam, cycladem - pictura est de museo; - quam cum dedicassent,
Aurelianum ipsum dicuntur duo Tetrici adhibuisse convivio.
26. Pudet iam persequi, quanti sub
Gallieno fuerint tyranni vitio pestis illius, si quidem erat in eo ea luxuria, ut
rebelles plurimos mereretur, et ea crudelitas, ut iure timeretur. Quare et in
Trebellianum bellatum, factum in Isauria principem ipsis Isauris sibi ducem
quaerentibus. Quem cum alii archipiratam vocassent, ipse se imperatorem
appellavit. Monetam etiam cudi iussit.
Palatium in arce Isauria constituit. Qui quidem cum se intima et tuta Isaurorum loca
munitus difficultatibus locorum et montibus contulisset, aliquandiu apud
Cilicas imperavit. Sed per Gallieni ducem Camsisoleum, natione Aegyptium,
fratrem Theodoti qui Aemilianum ceperat, ad campum deductus victus est et
occisus. Neque tamen postea Isauri
timore, ne in eos Gallienus saeviret, ad aequalitem perduci quavis principum
humanitate potuerunt. Denique post Trebellianum pro barbaris habentur; etenim
in medio Romani nominis solo regio eorum novo genere custodiarum quasi limes
includitur, locis defensa, non hominibus; nam sunt non satura decori, non
virtute graves, non instructi armis, non consiliis prudentes, sed hoc solo
securi, quod in editis positi adiri nequeunt. Quos quidem divus Claudius paene
ad hoc perduxerat, ut a suis semotos locis in Cilicia conlocaret, daturus uni
ex amicissimis omnem Isaurorum possessionem, ne quid ex ea postea rebellionis
oreretur.
27.
Odenatus moriens duos parvulos reliquit,
Herrenianum et fratrem eius Timolaum, quorum nomine Zenobia usurpato sibi
imperio diutius quam feminam decuit rem p. obtinuit, parvulos Romani
imperatoris habitu praeferens purpuratos eosdemque adhibens contionibus, quas illa
viriliter frequentavit, Didonem et Samiramidem et Cleopatram sui generis
principem inter cetera praedicans. Sed de horum exitu incertum est; multi enim
dicunt eos ab Aureliano interemptos, multi morte suo esse consumptos, si quidem
Zenobiae posteri etiam nunc Romae inter nobiles manent.
|