|
1.
Marco Antonino, in omni vita philosophanti viro
et qui sanctitate vitae omnibus principibus antecellit, pater Annius Verus, qui
in praetura decessit, avus Annius Verus, iterum consul et praefectus urbi,
adscitus in patricios a principibus (a) Vespasiano et Tito censoribus, patruus
Annius Libo consul, amita Galeria Faustina Augusta, mater Domitia Calvilla,
Calvisii Tulli bis consulis filia, proavus paternus Annius Verus praetorius ex
Uccubitano municipio ex Hispania factus senator, proavus maternus Catilius
Severus bis consul et praefectus urbi, avia paterna Rupilia Faustina, Rupili
Boni consularis filia, fuere. Natus est Marcus Romae VI. kl. Maias in monte Caelio in hortis avo suo iterum et Augure
consulibus. Cuius familia in originem recurrens a Numa probatur sanguinem
trahere, ut Marius Maximus docet; item a rege Sallentino Malemnio, Dasummi
filio, qui Lopias condidit. Educatus est in eo loco, in quo natus est, et in
domo avi sui Veri iuxta aedes Laterani. Habuit et sororem natu minorem Anniam
Cornificiam, uxorem Anniam Faustinam, consobrinam suam. Marcus Antoninus
principio aevi sui nomen habuit Catilii Severi, materni proavi. Post excessum
vero patris ab Hadriano Annius Verissimus vocatus est, post virilem autem togam
Annius Verus. patre mortuo ab avo paterno adoptatus et educatus est.
2.
Fuit a prima infantia gravis. at ubi egressus
est annos, qui nutricum foventur auxilio, magnis praeceptoribus traditus ad
philosophiae scita pervenit. Usus est magistris ad prima elementa Euforione
litteratore et Gemino comoedo, musico Androne eodemque geometra. Quibus omnibus ut
disciplinarum auctoribus plurimum detulit. Usus praeterea grammaticis Graeco
Alexandro Cotiaensi, Latinis Trosio Apro et Polione et Eutychio Proculo
Siccensi. Oratoribus usus est Graecis Aninio Macro, Caninio Celere et Herode
Attico, Latino Frontone Cornelio. Sed multum ex his Frontoni detulit, cui et
statuam in senatu petit. Proculum vero usque ad proconsulatum provexit oneribus
in se receptis. Philosophiae operam vehementer dedit et quidem adhuc puer. Nam
duodecimum annum ingressus habitum philosophi sumpsit et deinceps tolerantiam,
cum studeret in pallio et humi cubaret, vix autem matre agente instrato
pellibus lectulo accubaret. Usus est etiam Commodo magistro, cuius ei adfinitas
fuerat destinata, usus est et Apollonio Chalcedonio stoico philosopho.
3. Tantum autem
studium in eo philosophiae fuit, ut adscitus iam (in) imperatoriam tamen ad
domum Apollonii discendi causa veniret. Audivit et Sextum Chaeronensem
Plutarchi nepotem, Iunium Rusticum, Claudium Maximum et Cinnam Catulum stoicos,
peripateticae vero studiosus audivit Claudium Severum, et praecipue Iunium Rusticum,
quem et reveritus est et sectatus, qui domi militiaeque pollebat, stoicae
disciplinae peritissimum; cum quo omnia communicavit publica privataque
consilia, cui etiam ante praefectos praetorio semper osculum dedit, quem et
consulem iterum designavit, cui post obitum a senatu statuas postulavit. Tantum
autem honoris magistris suis detulit, ut imagines eorum aureas in larario
haberet ac sepulchra eorum aditu, hostiis, floribus semper honoraret. Studuit
et iuri audiens Lucium Volusium Maecianum. Tantumque operis et laboris studiis
inpendit, ut corpus adficeret, atque in hoc solo pueritia eius reprehenderetur.
Frequentavit et declamatorum scolas publicas amavitque [ex] condiscipulis
praecipuos senatorii ordinis Seium Fuscianum et Aufidium Victorinum, ex equestri
Baebium Longum et Callenum. In quos maxime liberalis fuit, et ita quidem ut,
quos non posset ob qualitatem vitae rei p. praeponere, locupletatos teneret.
4. Educatus est in
Hadriani gremio, qui illum, ut supra diximus, Verissimum nominabat et qui ei
honorem equi publici sexenni detulit, octavo aetatis anno in saliorum collegium
rettulit. In saliatu omen accepit imperii: coronas omnibus in pulvinar ex more
iacientibus aliae aliis locis haeserunt, huius velut manu capiti Martis aptata
est. Fuit in eo sacerdotio et praesul et vates et magister et multos
inauguravit atque exauguravit nemine praeeunte, quod ipse carmina cuncta
didicisset. Virilem togam sumpsit quinto
decimo aetatis anno, statimque ei Lucii Ceionii Commodi filia desponsata est ex
Hadriani voluntate. Nec multo post praefectus feriarum Latinarum fuit. In quo
honore praeclarissime se pro magistratibus agentem et in conviviis Hadriani
principis ostendit. Post hoc patrimonium paternum sorori totum concessit, cum
eum ad divisionem mater vocaret, responditque avi bonis se esse contentum,
addens, ut et mater, si vellet, in sororem suum patrimonium conferret, ne
inferior esset soror marito. Fuit autem vitae indulgentia, ut cogeretur
nonnumquam vel in venationes pergere vel in theatrum descendere vel spectaculis
interesse. Operam praeterea pingendo sub magistro Diogeneto dedit. Amavit pugilatum
luctamina et cursum et aucupatus et pila lusit adprime et venatus est. Sed ab
omnibus his intentionibus studium eum philosophiae abduxit seriumque et gravem
reddidit, non tamen prorsus abolita in eo comitate, quam praecipue suis, mox
amicis atque etiam minus notis exhibebat, cum frugi esset sine contumacia,
verecundus sine ignavia, sine tristitia gravis.
|