15 - Censorio Attico Agricio Retori

Eloquii merito primis aequande, fuisti,
Agrici, positus posteriore loco,
aevo qui quoniam genitus functusque recenti,
dilatus nobis, non et omissus eras.
Quocumque in numero, tristi memorabere threno:
unus honos tumuli, serus et ante datus.
Tam generis tibi celsus apex quam gloria fandi,
gloria Athenaei cognita sede loci.
Nazario et claro quondam delata Paterae
egregie multos excoluit iuvenes.
Coniuge nunc natisque superstitibus generoque
maiorum manes et monumenta foves.