7 - Aemilia Corinthia Maura avia

Aemiliam nunc fare aviam, pia cura nepotis,
coniunx praedicto quae fuit Arborio.
Nomen huic ioculare datum, cute fusca quod olim
aequales inter Maura vocata fuit.
Sed non atra animo, qui clarior esset olore
et non calcata qui nive candidior.
Et non deliciis ignoscere prompta pudendis
ad perpendiculum seque suosque habuit.
Haec me praereptum cunis et ab ubere matris
blanda sub austeris inbuit imperiis.
Tranquillos aviae cineres praestate quieti
aeternum manes, si pia verba loquor.