22 - De Thrasybulo Lacedaemonio, qui fortissime dimicans occubuit

Excipis adverso quod pectore volnera septem,
arma super veheris quod, Thrasybule, tua,
non dolor hic patris, Pitanae sed gloria maior:
rarum tam pulchro funere posse frui.
Quem postquam maesto socii posuere feretro,
talia magnanimus edidit orsa pater:
«flete alios, natus lacrimis non indiget ullis;
et meus et talis et Lacedaemonius».