XLIX. Tertianae typo remediando.

Est etiam alternis febris rediviva diebus,
tempora discernens quasi iustae pondere librae.
Ut possis igitur talem prohibere furorem,
involves cera sine caudis grana cumini
puniceaeque indes pelli colloque ligabis.
Pulei ramus lanae velatus amictu
tempore suspecto medicos praebebit odores.
Praeterea tritus cimex sorbendus in ovo,
horridus attactu, sed gustu commodus apto.