|
Rapa quam rotundissima sumito, eaque, si sunt lutosa, detergito, et
summam cutem novacula decerpito; deinde, sicut consueverunt salgamarii,
decusatim ferramento lunato incidito, sed caveto, ne usque ad imum praecidas
rapa. Tum salem inter incisuras raporum non nimium minutum adspergito et rapa
in alveo aut seria conponito, et, sale plusculo inspersa, triduo sinito, dum exsudent.
Post tertium diem mediam fibram rapi gustato, si receperit salem; deinde, cum
videbitur satis recepisse, [et] exemptis omnibus singula suo sibi iure eluito;
vel, si non multum liquoris fuerit, muriam duram adicito et ita eluito et
postea in quadratam cistam vimineam, quae neque [non] spisse, solide tamen et
crassis viminibus contexta sit, rapa conponito. Deinde sic aptatam tabulam superponito, ut usque ad fundum,
si res exigat, intra cistam deprimi possit. Cum eam tabulam sic aptaveris,
gravia pondera superponito et sinito nocte tota et uno die siccari; tum in
dolio picato fictili vel in vitreo conponito et sic infundito sinapi, ut a iure
contegantur.
Napi quoque, sed integri, si minuti sunt, maiores autem insecti,
eodem iure, quo rapa, condiri possunt; sed curandum est, ut haec utraque,
antequam caulem agant et cymam faciant, dum sunt tenera, conponantur.
ALITER.
Napos minutos integros, aut rursus amplos in tres aut
quattuor partes divisos, in vas coicito et aceto infundito. Salis quoque cocti
unum sextarium in congium aceti adicito; post tricensimum diem uti poteris.
|