|
1. Servius Sulpicius, iuris
civilis auctor, vir bene litteratus, scripsit ad M. Varronem rogavitque, ut
rescriberet, quid significaret verbum, quod in censoris libris scriptum esset.
2. Id
erat verbum "favisae Capitolinae". Varro rescripsit in memoria sibi
esse, quod Q. Catulus curator restituendi Capitolii dixisset voluisse se aream
Capitolinam deprimere, ut pluribus gradibus in aedem conscenderetur
suggestusque pro fastigii magnitudine altior fieret, sed facere id non quisse,
quoniam "favisae" impedissent.
3. Id
esse cellas quasdam et cisternas, quae in area sub terra essent, ubi reponi
solerent signa vetera, quae ex eo templo collapsa essent, et alia quaedam
religiosa e donis consecratis. Ac deinde eadem epistula negat quidem se in
litteris invenisse, cur "favisae" dictae sint, sed Q. Valerium
Soranum solitum dicere ait, quos "thesauros" Graeco nomine
appellaremus, priscos Latinos "flavisas" dixisse, quod in eos non
rude aes argentumque, sed flata signataque pecunia conderetur.
4.
Coniectare igitur se detractam esse ex eo verbo secundam litteram et
"favisas" esse dictas cellas quasdam et specus, quibus aeditui
Capitolii uterentur ad custodiendas res veteres religiosas.
|