|
1.
Laberius in mimis, quos scriptitavit, oppido quam verba finxit praelicenter.
2.
Nam et "mendicimonium" dicit et "moechimonium" et
"adulterionem" "adulteritatem"que pro "adulterio"
et "depudicavit" pro "stupravit" et "abluvium"
pro "diluvio" et, quod in mimo ponit, quem Cophinum inscripsit,
3.
"manuatus est" pro "furatus est" et item in Fullone furem
"manuarium" appellat:
"manuari", inquit "pudorem perdidisti",
multaque alia huiuscemodi novat.
4.
Neque non obsoleta quoque et maculantia ex sordidiore vulgi usu ponit, quale
est in Staminariis:
tollet bona fide vos Orcus nudas in catomum.
5.
Et "elutriare lintea" et "lavandaria" dicit, quae ad
lavandum sint data, et:
"coicior" inquit "in fullonicam",
et
quid properas? ecquid praecurris Calidoniam?
6. Item
in Restione "talabarriunculos" dicit, quos vulgus
"talabarriones";
7. item
in Compitalibus:
malas malaxavi;
8. item
in Cacomnemone:
"hic est" inquit
"ille gurdus, quem ego me abhinc menses duos ex Africa
venientem excepisse tibi narravi".
9. Item
in mimo, qui inscribitur Natalicius, "cippum" dicit et
"obbam" et "camellam" et "pittacium" et
"capitium":
"induis" inquit "capitium tunicae pittacium".
10.
Praeterea in Anna Peranna "gubernium" pro "gubernatore" et
"planum" pro "sycophanta" et "nanum" pro
"pumilione" dicit; quamquam "planum" pro "sycophanta"
M. quoque Cicero in oratione scriptum reliquit, quam pro Cluentio dixit.
11. Atque
item in mimo, qui Saturnalia inscriptus est, "botulum" pro
"farcimine" appellat et "hominem levennam" pro
"levi".
12. Item
in Necyomantia "cocionem" pervulgate dicit, quem veteres
"arillatorem" dixerunt. Verba Laberi haec sunt:
duas uxores? hercle hoc plus negoti est, inquit cocio;
sex aediles viderat.
13.
Sed enim in mimo, quem inscripsit Alexandream, eodem quidem, quo vulgus, sed
probe Latineque usus est Graeco vocabulo: "emplastrum" enim dixit
outheteros, non genere feminino, ut isti novicii semidocti.
14.
Verba ex eo mimo adposui:
quid est ius iurandum? emplastrum aeris alieni.
|