|
1. Contra astringunt
panis ex siligine vel ex simila, magis si sine fermento est, magis etiam si
ustus est, intenditurque vis eius etiam, si bis coquitur, pulticula vel ex
halica vel ex panicio vel ex milio, itemque ex isdem sorbitio, et magis si haec
ante fricta sunt; lenticula, cui vel beta vel intubus vel ambubeia vel plantago
adiecta est, magisque etiam si illa ante fricta est, per se etiam intubus vel
ex plantagine vel ambubeia fricta, minuta holera, brassica bis decocta;
2. dura ova, magisque
si assa sunt; minutae aves, merula, palumbus, magisque in posca si decoctus
est, grues, omnes aves, quae magis currunt quam volant; lepus, caprea, iecur ex
eis, quae sebum habent, maximeque bubulum, ac sebum ipsum; caseus, qui
vehementior vetustate fit vel ea mutatione, quam in eo transmarino videmus, aut
si recens est, ex melle mulsove decoctus;
3. item mel coctum,
pira inmatura, sorua, magisque ea, quae torminalia nominantur, mala Cotonea et
Punica, oleae vel albae vel permaturae, murta, palmulae, purpurae, murices,
vinum resinatum vel asperum, item meracum, acetum, mulsum quod infervuit, item
defrutum, passum, aqua vel tepida vel praefrigida, dura, id est ea, quae tarde
putrescit, ideoque pluuia potissimum; omnia dura, macra, austera, aspera,
tosta, et in eadem carne assa potius quam elixa.
|