VIII. De scriptoribus divinorum librorum.

1. [Delta] Scriptores divinorum librorum qua ratione cognoscimus? [Mu] Tribus modis: aut ex titulis et prooemiis, ut propheticos libros et apostoli epistulas, aut ex titulis tantum, ut evangelistas, aut ex traditione veterum, ut Moyses traditur scripsisse quinque primos libros historiae, cum non dicat hoc titulus nec ipse referat, «Dixit Dominus ad me,» sed quasi de alio, «Dixit Dominus ad Moysen.» Similiter et Iesu Nave liber ab eo quo nuncupatur traditur scriptus, et primum regum librum Samuel scripsisse perhibetur.

2. Sciendum praeterea quod quorundam librorum penitus ignorantur auctores, ut Iudicum et Ruth et Regum III ultimi et cetera similia; quod ideo credendum est divinitus dispensatum, ut alii quoque divini libri non auctorum merito, sed Sancti Spiritus gratia tantum culmen auctoritatis obtinuisse noscantur.