143. Nunc vero ex novo senatus consulto, quod auctore divo Hadriano factum est, si quidem vivo patre causa probatur, aeque ut olim omni modo rumpit testamentum; si vero post mortem patris, praeteritus quidem rumpit testamentum, si vero heres in eo scriptus est vel exheredatus, non rumpit testamentum, ne scilicet diligenter facta testamenta rescinderentur eo tempore, quo renovari non possent.