20 Reverso autem domum
Hwetberegto, advocatur episcopus Acca; et solita illum in abbatis officium
benedictione confirmat. Qui inter innumera monasterii iura quae iuvenili sagax
sollertia recuperabat, hoc in primis omnibus delectabile et gratificum fecit;
sustulit ossa Eosterwini abbatis, quae in porticu ingressus aecclesiae beati
apostoli Petri erant posita, necnon et ossa Sicgfridi abbatis ac magistri
quondam sui, quae foris sacrarium ad meridiem fuerant condita, et utraque in
una theca sed medio pariete divisa recludens, intus in eadem aecclesia iuxta
corpus beati patris Benedicti composuit. Fecit autem haec die natalis
Sicgfridi, id est, undecimo Kalendarum Septembrium, quo etiam die mira Dei
providentia contigit, ut venerandus Christi famulus Uitmer, cuius supra
meminimus, excederet, et in loco, ubi praedicti abbates prius sepulti fuerant,
ipse, qui eorum imitator fuerat, conderetur.
|