21 Christi vero famulus
Ceolfridus, ut supradictum est, ad limina beatorum apostolorum tendens,
priusquam illo pervenisset, tactus infirmitate diem clausit ultimum. Perveniens
namque Lingonas circa horam diei tertiam, decima ipsius diei hora migravit ad
Dominum, et crastino in ecclesia beatorum Geminorum martyrum honorifice
sepultus est, non solum Anglis genere qui plusquam octoginta numero in eius
fuerant comitatu, sed et illius loci accolis pro retardato tam reverendi senis
desiderio, in lacrimas luctusque solutis. Neque enim facile quisquam lacrimas
tenere potuit, videns comites ipsius partim patre amisso caeptum iter agere;
partim mutata intentione, qua Romam ire desiderant, domum magis, qua hunc
sepultum nuntiarent, reverti; partim ad tumbam defuncti inter eos, quorum nec
linguam noverant, pro inextinguibili Patris affectu residere.
|