XV.

1. Longum est recensere etiam de illis quos in sidera sepelistis et audaciter deis ministratis. Sic, opinor, digni de caelo Castores et Perseus et Erigona, quemadmodum et Iovis exoletus. Sed quid mirandum? Etiam canes et scorpios et cancros in caelum transtulistis!

2. Differo de his quos in oraculis co< . . . . . > et testimonium hic divini. Qui et tristitiae deos arbitros esse uoltis, ut sit Viduus, qui animam corpore uidvet, quem intra muros cludi non permittendo damnastis, item Caeculus, qui oculos sensu exanimet, item Orbana, quae in orbitatem semina extinguat; et ipsius mortis dea est.

3. Ut cetera transuolem, etiam locorum urbis uel loca deos arbitramini, arcuum Ianum patrem (et diva Arquis est Iana), et montium septem Montinum.

4. < . . . . . . . . . . > illi faciunt, qui in isdem locis aras uel aedes habent, prae. .......... in alieno loco aut mercedibus habitant.

5. Taceo Ascensum ab ascensibus, et Clivicolam a clivis; taceo deos Forculum a foribus et Cardeam a cardinibus et liminum Limentinum, sive qui alii inter uicinos apud uos numinum ianitorum adorantur.

6. Quid enim magnum, cum et numina sua habeant in lupanaribus, in culinis, et in imo carcere in< . . . . . . . >?

7. Cum haec itaque propria his aliisque Romanorum deis, quibus totius uitae officia distribuuntur, taliter ut ceteris deis opus non sit, immo cum privatim apud Romanos deputentur, quos supra signavimus, nec facile foris cogniti, quomodo ea omnia, quibus illos praeesse uoluerunt, in omni genere humano et in omni gente proveniunt, ubi praesides eorum non modo honore, sed ipsa quoque notitia carent?