Eucharistica coadunatio

32. Haec vitae ecclesialis condicio in Eucharistia non modo peculiarem quandam invenit sese exprimendi vim, verum etiam quodam modo suum locum « fontanum ».(³⁹) Eucharistia alit et Ecclesiam efformat: « Quoniam unus panis, unum corpus multi sumus, omnes enim de uno pane participamur » (1 Cor 10,17). Hanc propter vitalem necessitudinem cum Corporis Sanguinis que Domini sacramento, Ecclesiae mysterium supremum in modum in Eucharistia enuntiatur, gustatur et vivitur.(⁴⁰) Insita ecclesialis Eucharistiae ratio habetur quotiescumque ipsa celebratur. Sed liquidius die illa manifestatur cum universa communitas convocatur ut Domini resurrectionis memoriam recolat. Insigniter Catholicae Ecclesiae Catechismus sic docet: « Dominicalis celebratio diei et Eucharistiae Domini in corde est vitae Ecclesiae ».(⁴¹)