1. Pridie quam pugnaremus, video in horomate hoc:
venisse Pomponium diaconum ad ostium carceris et pulsare vehementer.
2. et exivi ad eum et aperui ei;
qui erat vestitus discincta candida, habens multiplices galliculas.
3. et dixit mihi: Perpetua, te
expectamus; veni. et tenuit mihi manum et coepimus ire per aspera loca et
flexuosa.
4. vix tandem pervenimus anhelantes
ad amphitheatrum et induxit me in media arena et dixit mihi: Noli pavere. hic
sum tecum et conlaboro tecum. et abiit.
5. et aspicio populum ingentem
adtonitum; et quia sciebam me ad bestias damnatam esse, mirabar quod non
mitterentur mihi bestiae.
6. et exivit quidam contra me
Aegyptius foedus specie cum adiutoribus suis pugnaturus mecum. veniunt et ad me
adolescentes decori, adiutores et fautores mei.
7. et expoliata sum et facta sum
masculus; et coeperunt me favisores mei oleo defricare, quomodo solent in
agone. et illum contra Aegyptium video in afa volutantem.
8. et exivit vir quidam mirae
magnitudinis ut etiam excederet fastigium amphitheatri, discinctatus, purpuram
inter duos clavos per medium pectus habens, et galliculas multiformes ex auro
et argento factas, et ferens virgam quasi lanista, et ramum viridem in quo
erant mala aurea.
9. et petiit silentium et dixit:
Hic Aegyptius, si hanc vicerit, occidet illam gladio; haec, si hunc vicerit,
accipiet ramum istum.
10. et recessit. et accessimus ad
invicem et coepimus mittere pugnos. ille mihi pedes adprehendere volebat; ego
autem illi calcibus faciem caedebam.
11. et sublata sum in aere et coepi
eum sic caedere quasi terram non calcans. at ubi vidi moram fieri, iunxi manus
ut digitos in digitos mitterem et apprehendi illi caput; et cecidit in faciem
et calcavi illi caput.
12. et coepit populus clamare et
favisores mei psallere. et accessi ad lanistam et accepi ramum.
13. et osculatus est me et dixit
mihi: Filia, pax tecum. et coepi ire cum gloria ad portam Sanavivariam. et
experrecta sum.
14. et intellexi me non ad bestias,
sed contra diabolum esse pugnaturam; sed sciebam mihi esse victoriam.
15. hoc usque in pridie muneris egi;
ipsius autem muneris actum, si quis voluerit, scribat.
|