-19-

1. Sed qui dixerat: Petite et accipietis, petentibus dederat eum exitum quem quis desideraverat.

2. nam, si quando inter se de martyrii sui voto sermocinabantur, Saturninus quidem omnibus bestiis velle se obici profitebatur, ut scilicet gloriosiorem gestaret coronam.

3. itaque in commissione spectaculi ipse et Revocatus leopardum experti etiam super pulpitum ab urso vexati sunt.

4. Saturus autem nihil magis quam ursum abominabatur; sed uno morsu leopardi confici se iam praesumebat.

5. itaque cum apro subministraretur, venator potius qui illum apro subligaverat, subfossus ab eadem bestia post dies muneris obiit; Saturus solummodo tractus est.

6. et cum ad ursurn substrictus esset in ponte, ursus de cavea prodire noluit. itaque secundo Saturus inlaesus revocatur.