34. Qualiter elefantiosus quidam, nomine Teio, curatus sit.

1 Elefantiosus etiam quidam, Teio nomine, de longinquis regionibus sancti Severini invitatus virtutibus venit, rogans eius oratione mundari. Accepto itaque ex more praecepto iubetur Deum, totius gratiae largitorem, sine cessatione lacrimabiliter exorare.

2 Quid plura? Precibus beati viri idem leprosus divina opitulatione mundatus, dum commutat mores in melius, mutare meruit et colorem, regis aeterni magnalia tam suis quam plurimorum vocibus longe lateque denuntians.