XXVI.

Vixi puellis nuper idoneus
et militavi non sine gloria;
   nunc arma defunctumque bello
      barbiton hic paries habebit,

laevom marinae qui Veneris latus
custodit. hic, hic ponite lucida
   funalia et vectis et arcus
      oppositis foribus minacis.

o quae beatam diva tenes Cyprum et
Memphin carentem Sithonia nive,
   regina, sublimi flagello
      tange Chloen semel arrogantem.