Gnaeus Iulius Agricola, vetere et inlustri
Foroiuliensium colonia ortus, utrumque avum procuratorem Caesarum habuit, quae
equestris nobilitas est. Pater illi Iulius Graecinus senatorii ordinis, studio
eloquentiae sapientiaeque notus, iisque ipsis virtutibus iram Gai Caesaris
meritus: namque Marcum Silanum accusare iussus et, quia abnuerat, interfectus
est. Mater Iulia Procilla fuit, rarae castitatis. In huius sinu indulgentiaque
educatus per omnem honestarum artium cultum pueritiam adulescentiamque
transegit. Arcebat eum ab inlecebris peccantium praeter ipsius bonam
integramque naturam, quod statim parvulus sedem ac magistram studiorum
Massiliam habuit, locum Graeca comitate et provinciali parsimonia mixtum ac
bene compositum. Memoria teneo solitum
ipsum narrare se prima in iuventa studium philosophiae acrius, ultra quam
concessum Romano ac senatori, hausisse, ni prudentia matris incensum ac
flagrantem animum coercuisset. Scilicet sublime et erectum ingenium
pulchritudinem ac speciem magnae excelsaeque gloriae vehementius quam caute
adpetebat. Mox
mitigavit ratio et aetas, retinuitque, quod est difficillimum, ex sapientia
modum.
|