At Tiridates pudore et metu, ne, si
concessisset obsidioni, nihil opis in ipso videretur, si prohiberet, impeditis
locis seque et equestres copias inligaret, statuit postremo ostendere aciem et
dato die proelium incipere vel simulatione fugae locum fraudi parare. igitur
repente agmen Romanum circumfundit, non ignaro duce nostro, qui viae pariter et
pugnae composuerat exercitum. latere dextro tertia legio, sinistro sexta
incedebat, mediis decimanorum delectis; recepta inter ordines impedimenta, et
tergum mille equites tuebantur, quibus iusserat, ut instantibus comminus
resisterent, refugos non sequerentur. in cornibus pedes sagittarius et cetera
manus equitum ibat, productior cornu sinistro per ima collium, ut, si hostis
intravisset, fronte simul et sinu exciperetur. adsultare ex diverso Tiridates,
non usque ad ictum teli, sed tum minitans, tum specie trepidantis, si laxare
ordines et diversos consectari posset. ubi nihil temeritate solutum, nec
amplius quam decurio equitum audentius progressus et sagittis confixus ceteros
ad obsequium exemplo firmaverat, propinquis tam tenebris abscessit.
|