]Perculso Seneca
promptum fuit Rufum Faenium imminuere Agrippinae amicitiam in eo criminantibus.
validiorque in dies Tigellinus et malas artes, quibus solis pollebat, gratiores
ratus, si principem societate scelerum obstringeret, metus eius rimatur; compertoque
Plautum et Sullam maxime timeri, Plautum in Asiam, Sullam in Galliam
Narbonensem nuper amotos, nobilitatem eorum et propinquos huic Orientis, illi
Germaniae exercitus commemorat. non se, ut Burrum, diversas spes, sed solam
incolumitatem Neronis spectare; cui caveri utcumque ab urbanis insidiis
praesenti opera: longinquos motus quonam modo comprimi posse? erectas Gallias
ad nomen dictatorium, nec minus suspensos Asiae populos claritudine avi Drusi. Sullam inopem, unde praecipuam audaciam, et
simulatione segnitiae, dum temeritati locum reperiret. Plautum magnis opibus ne
fingere quidem cupidinem otii, sed veterum Romanorum imitamenta praeferre,
adsumpta etiam Stoicorum adrogantia sectaque, quae turbidos et negotiorum
adpetentes faciat. nec ultra mora. Sulla sexto die pervectis Massiliam
percussoribus ante metum et rumorem interficitur, cum epulandi causa
discumberet. relatum caput eius inlusit Nero tamquam praematura canitie
deforme.
|