Scaena octava. Plesidippus-Trachalio

PLES. Iterum mihi istaec omnia itera, mi anime, mi Trachalio,
mi liberte, mi patrone potius, immo mi pater.
repperit patrem Palaestra suom atque matrem? TRACH. Repperit.
PLES. Et popularis est? TRACH. Opino. PLES. Et mihi nuptura est?
TRACH. Suspicor. PLES. Censen hodie despondebit eam mihi, quaeso? TRACH. Censeo.
PLES. Quid? patri etiam gratulabor cum illam invenit? TRACH. Censeo.
PLES. Quid matri eius? TRACH. Censeo. PLES. Quid ergo censes? TRACH. Quod rogas,
censeo. PLES. Dic ergo quanti censes? TRACH. Egone? censeo.
PLES. Adsum equidem, ne censionem semper facias. TRACH. Censeo.
PLES. Quid si curram? TRACH. Censeo. PLES. An sic potius placide? TRACH. Censeo.
PLES. Etiamne eam adveniens salutem? TRACH. Censeo. PLES. Etiam patrem?
TRACH. Censeo. PLES. Post eius matrem? TRACH. Censeo. PLES. Quid postea?
etiamne adveniens complectar eius patrem? TRACH. Non censeo.
PLES. Quid matrem? TRACH. Non censeo. PLES. Quid eampse illam? TRACH. Non censeo.
PLES. Perii, dilectum dimisit. nunc non censet, cum volo.
TRACH. Sanus non es. sequere.-- PLES. Duc me, mi patrone, quo libet.--