ACTUS TERTIUS

Scaena prima. Lysidamus-Alcesimus

LY. Nunc amici anne inimici sis imago, Alcesime,
mihi sciam, nunc specimen specitur, nunc certamen cernitur.
cur amem me castigare, id ponito ad compendium,
'cano capite' 'aetate aliena' eo addito ad compendium,
'cui sit uxor' id quoque illuc ponito ad compendium.
AL. Miseriorem ego ex amore quam te vidi neminem.
LY. Fac vacent aedes. AL. Quin edepol servos ancillas domo
certum est omnis mittere ad te. LY. Oh, nimium scite scitus es.
sed facito dum merula pervorsus quos cantat colas:
cum cibo suo quique facito ut veniant, quasi eant Sutrium.
AL. Meminero. LY. Em, nunc enim te demum nullum scitum scitiust.
cura, ego ad forum modo ibo: iam hic ero. AL. Bene ambula.
LY. Fac habeant linguam tuae aedes. AL. Quid ita? LY. Cum veniam, vocent.
AL. Attatae, caedundus tu homo es: nimias delicias facis.
LY. Quid me amare refert, nisi sim doctus dicaculus?
sed tu cave in quaesitione mihi sis. -- AL. Usque adero domi.